មូលនិធិរូបិយវត្ថុអន្តរជាតិ IMF នៅថ្ងៃសុក្រ (២៤ តុលា) នេះ បានជំរុញឱ្យអាស៊ី កាត់បន្ថយរបាំងមិនមែនពន្ធ និងធ្វើសមាហរណកម្មពាណិជ្ជកម្មឱ្យកាន់តែប្រសើរនៅក្នុងតំបន់ ដើម្បីកាត់បន្ថយភាពងាយរងគ្រោះរបស់ខ្លួនចំពោះពន្ធគយរបស់សហរដ្ឋអាមេរិក និងវិបត្តិហិរញ្ញវត្ថុសកល។

ក្នុងរបាយការណ៍ចក្ខុវិស័យសេដ្ឋកិច្ចក្នុងតំបន់សម្រាប់អាស៊ី IMF បាននិយាយថា ពាណិជ្ជកម្មគឺជាចំណុចដ៏សំខាន់នៃកំណើនសេដ្ឋកិច្ចអាស៊ី ហើយប្រទេសចិន បានបម្រើជាមជ្ឈមណ្ឌលផ្គត់ផ្គង់ទំនិញសម្រាប់ផលិតកម្មនៅទូទាំងពិភពលោក ដែលបែបនេះបានធ្វើឱ្យអាស៊ីងាយរងគ្រោះខ្លាំងក្នុងភាពតានតឹងពាណិជ្ជកម្មអាមេរិក-ចិន រួមទាំងការដំឡើងពន្ធរបស់លោកប្រធានាធិបតី Donald Trump ។

លោក Krishna Srinivasan ប្រធាននាយកដ្ឋានអាស៊ី និងប៉ាស៊ីហ្វិករបស់ IMF បានប្រាប់សារព័ត៌មានរ៉យទ័រថា "ប្រសិនបើអាស៊ីធ្វើសមាហរណកម្មកាន់តែច្រើននៅក្នុងតំបន់ នោះអាចផ្តល់ឱ្យតំបន់នេះនូវតំបន់ទ្រនាប់មួយប្រឆាំងនឹងការប៉ះទង្គិចពីខាងក្រៅ" ។

លោក Srinivasan បាននិយាយថា ជាមួយនឹងការធ្វើសមាហរណកម្មពាណិជ្ជកម្មក្នុងតំបន់កាន់តែខ្លាំង អាស៊ីអាចឃើញផលិតផលក្នុងស្រុកសរុប GDP កើនឡើងដល់ទៅ ១,៤% ក្នុងរយៈពេលមធ្យម ហើយសេដ្ឋកិច្ចនៃសមាគមប្រជាជាតិអាស៊ីអាគ្នេយ៍ (អាស៊ាន) អាចឡើងរហូតដល់ ៤%៕