យោធារបស់លីទុយអានី បានឲ្យដឹងថា យន្តហោះយោធារុស្ស៊ី ២គ្រឿង បានចូលដែនអាកាសរបស់លីទុយអានី ដែលជាប្រទេសសមាជិកអង្គការណាតូ (NATO) កាលពីថ្ងៃព្រហស្បតិ៍ (២៣ ខែតុលា) រយៈពេលប្រហែល ១៨វិនាទី។

យោធាបានបញ្ជាក់ថា យន្តហោះ ២គ្រឿង ដែលជាយន្តហោះចម្បាំង Su-30 និងយន្តហោះផ្ទុកប្រេង Il-78 អាចស្ថិតនៅក្នុងបេសកកម្មហ្វឹកហ្វឺនចាក់ប្រេង នៅពេលដែលពួកគេបានហោះក្នុងចម្ងាយ ៧០០ម៉ែត្រចូលទៅក្នុងប្រទេសលីទុយអានី ពីតំបន់ Kaliningrad នៅវេលាម៉ោងប្រហែល ១៥:០០ ម៉ោងសកល។

នាយករដ្ឋមន្ត្រីលីទុយអានី លោកស្រី Inga Ruginiene បានលើកឡើងនៅលើបណ្ដាញសង្គម Facebook ថា៖ «ឧប្បត្តិហេតុនេះ បង្ហាញជាថ្មីម្តងទៀតថា រុស្ស៊ីកំពុងមាននូវទង្វើ ដូចជារដ្ឋភេរវករ មិនគោរពច្បាប់អន្តរជាតិ និងសន្តិសុខនៃបណ្ដាប្រទេសជិតខាង»។

លោកស្រីបានបន្ថែមថា៖ «ប្រទេសលីទុយអានីមានសុវត្ថិភាព។ រួមគ្នាជាមួយសម្ព័ន្ធមិត្តរបស់យើង យើងមើលថែ ហើយនឹងការពារគ្រប់សង់ទីម៉ែត្រនៃប្រទេសរបស់យើង»។

យោធាបានឲ្យដឹងទៀតថា យន្តហោះចម្បាំង Eurofighter Typhoon របស់អេស្ប៉ាញ មកពីនគរបាលអាកាសបាល់ទិកអង្គការណាតូ (NATO Baltic Air Police) ត្រូវបានដាក់ពង្រាយយ៉ាងប្រញាប់ប្រញាល់ ជាការឆ្លើយតប និងកំពុងល្បាតក្នុងតំបន់នេះ។

គួរដឹងថា កាលពីថ្ងៃទី១៩ ខែកញ្ញា យន្តហោះយោធារុស្ស៊ី ៣គ្រឿង បានបំពានចូលដែនអាកាសរបស់អេស្តូនីរយៈពេល ១២នាទី។ អង្គការណាតូបានប្រញាប់ប្រញាល់បញ្ចេញយន្តហោះចម្បាំង និងអមដំណើរយន្តហោះរបស់រុស្ស៊ីទាំង ៣គ្រឿងនោះឲ្យចេញពីដែនអាកាសលីទុយអានី។ យ៉ាងណាក្ដី រុស្ស៊ីបានបដិសេធថា យន្តហោះរបស់ខ្លួនមិនបានរំលោភចូលតាមការចោទប្រកាន់នោះឡើយ ដោយបញ្ជាក់ថា ទីក្រុង Tallinn គ្មានភស្តុតាងគាំទ្រដល់ការអះអាងរបស់ខ្លួនឡើយ ហើយកំពុងប្រឹងប្រែងធ្វើឲ្យភាពតានតឹងលោកខាងកើត-លោកខាងលិចកាន់តែឡើងកម្ដៅខ្លាំងទៅៗ៕