នៅក្នុងសេចក្តីថ្លែងការណ៍រួមមួយដែលត្រូវបានរាយការណ៍ដោយទីភ្នាក់ងារសារព័ត៌មានផ្លូវការរបស់អារ៉ាប៊ីសាអ៊ូឌីត (SPA) ប្រទេសអារ៉ាប៊ីសាអ៊ូឌីត ព្រមទាំងបណ្ដារដ្ឋមូស្លីម និងអារ៉ាប់មួយចំនួនផ្សេងទៀត កាលពីថ្ងៃព្រហស្បតិ៍ (ទី២៣ ខែតុលា) បានថ្កោលទោសសេចក្ដីព្រាងច្បាប់របស់អ៊ីស្រាអែលចំនួន២ ដែលអំពាវនាវឲ្យមានការបញ្ចូលតំបន់កាន់កាប់ West Bank ជាដែនដីឧបសម្ព័ន្ធ។

សេចក្តីថ្លែងការណ៍ដែលត្រូវបានរាយការណ៍ដោយសារព័ត៌មាន SPA បានរៀបរាប់ថា៖ «ប្រទេសអារ៉ាប៊ីសាអ៊ូឌីត ហ្ស៊កដានី ឥណ្ឌូនេស៊ី ប៉ាគីស្ថាន ទួរគី ជីប៊ូទី អូម៉ង់ ហ្គាំប៊ី ប៉ាឡេស្ទីន កាតា គុយវ៉ែត លីប៊ី ម៉ាឡេស៊ី អេហ្ស៊ីប នីហ្សេរីយ៉ា សម្ព័ន្ធអារ៉ាប់ និងអង្គការសហប្រតិបត្តិការឥស្លាម ថ្កោលទោសយ៉ាងដាច់អហង្ការ ចំពោះការអនុម័តរបស់សភាអ៊ីស្រាអែល លើសេចក្តីព្រាងច្បាប់ទាំងនេះ»។ ប្រទេសទាំងនោះបានថ្កោលទោសទង្វើនេះថា ជាការរំលោភច្បាប់អន្តរជាតិយ៉ាងធ្ងន់ធ្ងរ។

គួរបញ្ជាក់ថា កាលពីថ្ងៃពុធ សភា Knesset របស់អ៊ីស្រាអែល បានបោះឆ្នោត ដើម្បីពិភាក្សាលើសេចក្ដីស្នើច្បាប់ចំនួន ២ ដែលនឹងបញ្ចូលផ្នែកខ្លះនៃតំបន់ West Bank ជាដែនដីឧបសម្ព័ន្ធ ពោលដែលជាដែនដីប៉ាឡេស្ទីនត្រូវបានកាន់កាប់ដោយអ៊ីស្រាអែលចាប់តាំងពីឆ្នាំ១៩៦៧ មក។ ចំណាត់ការនេះកើតឡើងស្របនឹងដំណើរទស្សនកិច្ចរបស់អនុប្រធានាធិបតីអាមេរិក លោក JD Vance កាលពីថ្ងៃពុធ និងរដ្ឋមន្ត្រីការបរទេស លោក Marco Rubio កាលពីថ្ងៃព្រហស្បតិ៍។

មន្ត្រីជាន់ខ្ពស់អាមេរិកទាំង ២រូប លើកឡើងថា សេចក្ដីស្នើច្បាប់នេះ បង្កជាហានិភ័យធ្វើឲ្យខូចដល់កិច្ចប្រឹងប្រែង ដើម្បីពង្រឹងបទឈប់បាញ់ដ៏ផុយស្រួយ នៅតំបន់ហ្កាហ្សា បន្ទាប់ពីមានជម្លោះដ៏មហន្តរាយរយៈពេល ២ឆ្នាំ រវាងអ៊ីស្រាអែល និងក្រុមហាម៉ាស៕