កាលពីថ្ងៃព្រហស្បតិ៍ (ទី២៣ ខែតុលា) រដ្ឋអាជ្ញាបានឲ្យដឹងថា អ្នកស៊ើបអង្កេតបារាំង កំពុងវិភាគសំណាក DNA និងស្នាមម្រាមដៃរាប់សិប បន្ទាប់ពីមានចោរកម្មគ្រឿងអលង្ការនៅសារមន្ទីរ Louvre កាលពីថ្ងៃចុងសប្តាហ៍កន្លងមក។

រដ្ឋអាជ្ញាក្រុងប៉ារីស លោកស្រី Laure Beccuau បានប្រាប់សារព័ត៌មានក្នុងស្រុក Ouest-France ថា «សំណាក DNA ស្នាមម្រាមដៃ និងដានផ្សេងៗទៀតរហូតដល់ទៅ ១៥០ ត្រូវបានកំណត់អត្តសញ្ញាណ»។ លោកស្រីបានបន្ថែមថា ការវិភាគទាំងនោះ គឺជាអាទិភាពមួយ ហើយសង្ឃឹមថា លទ្ធផលនៅក្នុងថ្ងៃបន្ទាប់ នឹងផ្ដល់នូវតម្រុយខ្លះៗ ជាពិសេសប្រសិនបើពិរុទ្ធជនមានកំណត់ត្រាព្រហ្មទណ្ឌ។

គួរបញ្ជាក់ថា កាលពីថ្ងៃទី១៩ ខែតុលា ក្រុមចោរបានឡើងតាមជណ្តើរហូតពីឡានដឹកទំនិញដែលពួកគេលួច ហើយប្រើឧបករណ៍កាត់ទម្លុះចូលទៅក្នុងវិចិត្រសាលជាន់ទី១ ដែលមានគ្រឿងអលង្ការ។ ពួកគេបានធ្លាក់មកុដពេជ្រ និងត្បូងមរកត ខណៈដែលពួកគេគេចខ្លួនចុះតាមជណ្ដើរ និងជិះម៉ូតូ ប៉ុន្តែនៅតែអាចគេចខ្លួនបាត់ជាមួយនឹងវត្ថុដែលលួចបាន ៨មុខ តាមតម្លៃប៉ាន់ស្មាន ១០២លានដុល្លារ។

កាលពីថ្ងៃទី២២ ខែតុលា នាយកសារមន្ទីរ Louvre បានទទួលស្គាល់ថា ពួកចោរបានឆ្លៀតចូលតាមកន្លែងងងឹតមួយដែលឧបករណ៍ឃ្លាំមើលសុវត្ថិភាពនៃជញ្ជាំងខាងក្រៅរបស់សារមន្ទីរចាប់មិនបាន។ ប៉ុន្តែលោកស្រី Beccuau បាននិយាយថា កាមេរ៉ាសុវត្ថិភាពសាធារណៈ និងឯកជននៅកន្លែងផ្សេងទៀត បានអនុញ្ញាតឲ្យអ្នកស៊ើបអង្កេតតាមដានកុ្រមចោរ «ទាំងនៅទីក្រុងប៉ារីស និងក្នុងតំបន់ជុំវិញ»៕