​រុស្ស៊ី៖ ប្រធានាធិបតី​រុស្ស៊ី​លោក Vladimir Putin បាន​ព្រមាន​ថា ​បណ្ដា​ប្រទេស​ជា​សមា​ជិ​ក​សហភាព​អឺរ៉ុប​នឹងត្រូវ​បាន​ទាញ​ឲ្យ​ធ្លា​ក់ចូលក្នុង​ជម្លោះ​យោធា បើ​ប្រទេស​អ៊ុយ​ក្រែ​ន​ចូល​ជា​សមាជិក​អង្គការ​ណា​តូ ក្រោយ​ជំនួប​ជាមួយ​លោក​ប្រធានាធិបតី​បារាំង Emmanuel Macron​។ ​ប្រធានាធិបតី​រុស្ស៊ី​ក៏បាន​ព្រមាន​ផងដែរ​ថា គ្មាន​អ្នកឈ្នះ​ពី​វិបត្តិ​ដែល​នៅតែ​បន្ត​នេះ​ទេ បន្ទាប់ពី​លោក​បាន​ជួប​ជាមួយ​សមា​ភាគីបារាំង​របស់លោកនៅ​វិមាន​ក្រឹម​ឡាំង សម្រាប់​ការជួបពិភាក្សា​ដែល​លោក​បាន​ហៅថា​ជា​ជំនួប​ដ៏​មាន​ប្រយោជន៍ មាន​សារៈសំខាន់ និង​មាន​លក្ខណៈ​ដូចជា​ពាណិជ្ជកម្ម​។

​វិមាន​ក្រឹម​ឡាំងចង់បាន​ការធានា​ពី​លោកខាងលិច​ថា អង្គការ​ណា​តូ​នឹងមិន​ទទួលយក​អ៊ុយ​ក្រែ​ន និង​ប្រទេស​អតីត​សហភាពសូវៀត​ផ្សេងទៀត​ជា​សមាជិក ហើយ​ថា​ខ្លួន​នឹង​បញ្ឈប់​ការដាក់​ពង្រាយ​អាវុធ​នៅ​ទីនោះ និង​បង្វែរ​កងកម្លាំង​របស់​ខ្លួន​ពី​អឺរ៉ុប​ខាងកើត ដោយ​ទាមទារ​ឱ្យ​សហរដ្ឋអាមេរិក និង​ណា​តូ​ទាត់ចោល​ពាក្យសម្ដី​ដែលថា ពួកខ្លួន​មិនមែនជា​អ្នក​ចាប់ផ្តើម​ជម្លោះ​នេះ​មុន​។​ ​យ៉ាងណា​​មុនពេល​លោក​ធ្វើដំណើរ​បន្តទៅ​កាន់​ប្រទេស​អ៊ុយ​ក្រែ​ន លោក​ប្រធានាធិបតី​បារាំងបាន​ប្រាប់​ក្រុម​អ្នកសារព័ត៌មាន​ថា លោក​ប្រធានាធិបតី Vladimir Putin បាន​សន្យា​ជាមួយ​លោ​កថា​ រុស្ស៊ី​នឹងមិន​បង្កើន​ភាព​តានតឹងជាថ្មី​ជុំវិញ​បញ្ហា​អ៊ុយ​ក្រែ​ន​៕

អត្ថបទ៖ សុខមាន