កងកម្លាំងគាំទ្ររហ័ស(RSF)មានគោលដៅលើរដ្ឋធានី Khartoum ប្រទេសស៊ូដង់ និងអាកាសយានដ្ឋានសំខាន់របស់ពួកគេ ដោយប្រើប្រាស់យានដ្រូន សម្រាប់រយៈពេល ៤ថ្ងៃជាប់ៗគ្នា ខណៈពេលដែលកងកម្លាំងប្រដាប់អាវុធស៊ូដង់ ព្យាយាមចាប់ផ្តើមឡើងវិញប្រតិបត្តិការផ្លូវអាកាស ក្រោយដណ្តើមបានការគ្រប់គ្រងទីក្រុងមួយនេះ កាលពីរយៈពេលជាច្រើនខែមុន ។

ប្រជាពលរដ្ឋរស់នៅជិតអាកាសយានដ្ឋានអន្តរជាតិក្រុង Khartoum និយាយប្រាប់កាសែត Al Jazeera ថា យានដ្រូន និងមីស៊ីលបាញ់ពីដីទៅលើអាកាស ត្រូវបានឮពីលើរដ្ឋធានី Khartoum នៅព្រឹកថ្ងៃសុក្រនេះ មុនពេលវាផ្ទុះយ៉ាងខ្លាំង ។

គេនៅមិនទាន់ដឹងច្បាស់ភ្លាមៗនោះទេថាតើ អាកាសយានដ្ឋានសំខាន់របស់រដ្ឋធានីមួយនេះ រងការវាយប្រហារដោយជោគជ័យឬយ៉ាងណានោះទេ ហើយនិងទំហំនៃការខូចខាតរបស់វា ។

ការវាយប្រហារនេះដែរ គឺជាថ្ងៃទី ៤នៃការវាយប្រហារជាបន្តបន្ទាប់ដែលបានចាប់ផ្តើមកាលពីថ្ងៃអង្គារ រយៈពេល ១ថ្ងៃ មុនពេលអាកាសយានដ្ឋានគ្រោងនឹងប្រតិបត្តិការឡើងវិញ ក្រោយរយៈពេលជាង ២ឆ្នាំនៃសង្រ្គាម ។

យន្តហោះ ១គ្រឿងប្រតិបត្តិការដោយក្រុមហ៊ុនក្នុងស្រុក Badr Airlines បានចុះចតកាលពីថ្ងៃពុធ មុនពេលមន្រ្តីអាកាសយានដ្ឋានដែលសុំមិនបញ្ចេញឈ្មោះនិយាយថា ការបើកអាកាសយានដ្ឋានឡើងវិញ ត្រូវបានផ្អាក រហូតដល់មានការជួនដំណឹងបន្ថែមទៀត ដោយសារការវាយប្រហារកាលពីពេលថ្មីៗនេះ ។

សូមបញ្ជាក់ថា សង្រ្គាមដែលបានផ្ទុះកាលពីខែមេសា ឆ្នាំ ២០២៣បានសម្លាប់មនុស្សរាប់ម៉ឺននាក់ មនុស្សប្រហែល ១២លាននាក់ ជម្លៀសខ្លួន ហើយនិងធ្វើឲ្យ ៣០លាននាក់ ត្រូវការជំនួយមនុស្សធម៌ និងធ្វើឲ្យប្រទេសមួយនេះក្លាយជាប្រទេសជួបវិបត្តិមនុស្សធម៌ធំបំផុតនៅលើពិភពលោក ៕