ក្រុមស៊ើបអង្កេតអង្គការសហប្រជាជាតិ(UN) និយាយថា ពួកគេបានរកឃើញភ័ស្តុតាងនៃការធ្វើទារុណកម្មជាប្រព័ន្ធដោយកងកម្លាំងសន្តិសុខមីយ៉ាន់ម៉ា ហើយនិងបានកំណត់អត្តសញ្ញាណមួយចំនួនរបស់ជនល្មើសជាន់ខ្ពស់ ។

ក្រុមយន្តការស៊ើបអង្កេតឯករាជ្យសម្រាប់មីយ៉ាន់ម៉ា(IIIM)ដែលបានបង្កើតឡើងកាលពីឆ្នាំ ២០១៨ ដើម្បីវិភាគភ័ស្តុតាងនៃការបំពានធ្ងន់ធ្ងរលើច្បាប់អន្តរជាតិ និយាយថា ជនរងគ្រោះក្លាយជាកម្មវត្ថុនៃការវាយដុំ ឆក់ខ្សែភ្លើង ការច្របាច់ក និងទម្រង់ផ្សេងទៀតនៃការធ្វើទារុណកម្ម ដូចជាការប្រើប្រាស់ដង្កាប់ដកក្រចកជាដើម ។

ការរកឃើញនៅក្នុងរបាយការណ៍នេះ មានរយៈពេល ១ឆ្នាំ រហូតដល់ថ្ងៃទី ៣០ ខែមិថុនា ដោយផ្អែកលើព័ត៌មានពីប្រភពចំនួនជាង ១.៣០០ រួមទាំងសាក្សីរាប់រយនាក់ដែលបានផ្តល់សក្ខីភាព ក៏ដូចជាភ័ស្តុតាងកោសល្យវិច្ច័យ និងរូបថតសន្លឹក ។

មីយ៉ាន់ម៉ា បានស្ថិតក្នុងភាពវឹកវរ ចាប់តាំងពីរដ្ឋប្រហារយោធាឆ្នាំ ២០២១ ប្រឆាំងរដ្ឋាភិបាលស៊ីវិលឈ្នះឆ្នោតដែលធ្វើឲ្យប្រទេសមួយនេះ ធ្លាក់ក្នុងសង្រ្គាមស៊ីវិល ។ មនុស្សរាប់ម៉ឺននាក់ ត្រូវបានឃាត់ខ្លួន ចាប់តាំងពីពេលនោះមក ៕