ការិយាល័យអភិបាលក្រុង បានឲ្យដឹងនៅថ្ងៃសុក្រ (ទី២៤ ខែតុលា) នេះថា ជនអន្តោប្រវេសន៍យ៉ាងហោចណាស់ ១៤នាក់ បានបាត់បង់ជីវិត នៅពេលដែលទូកពោងដឹកពួកគេ បានក្រឡាប់លិច ក្នុងសមុទ្រ Aegean នៅម្ដុំរមណីយដ្ឋាន Bodrum របស់ប្រទេសទួរគី ដោយបានបង្កើនចំនួនអ្នកស្លាប់ដែលរាយការណ៍នៅមុននេះ ៧នាក់។

ដោយដកស្រង់សម្ដីរបស់អ្នកនៅរស់រានមានជីវិតម្នាក់ ក្នុងចំណោម ២នាក់ដែលបាននិយាយថា មានមនុស្ស ១៨នាក់ជិះនៅលើទូកនោះ នៅពេលដែលក្រឡាប់លិច ការិយាល័យអភិបាលក្រុង Mugla បានឲ្យដឹងនៅលើបណ្ដាញសង្គម X ថា៖ «សាកសពជនអន្តោប្រវេសន៍ខុសច្បាប់ ១៤នាក់ ត្រូវបានរកឃើញ និងស្រង់ឡើង»។ ចំណែកជោគវាសនារបស់មនុស្ស ២នាក់ផ្សេងទៀត មិនដឹងយ៉ាងណានោះទេ។

រមណីយដ្ឋាន Bodrum គឺនៅជិតបណ្ដុំកោះរបស់ក្រិក ដូចជាកោះ Kos ជាដើម ជាទីទាក់ទាញជនអន្តោប្រវេសន៍ ដែលសង្ឃឹមថា នឹងបានទៅដល់ប្រទេសតំបន់អឺរ៉ុប។ មានការបាត់បង់ជីវិតយ៉ាងច្រើន អំឡុងការធ្វើដំណើរដ៏គ្រោះថ្នាក់ទៅកាន់ប្រទេសក្រិក។

អង្គការអន្តរជាតិ សម្រាប់ទេសន្តរប្រវេសន៍របស់អង្គការសហប្រជាជាតិ បានឲ្យដឹងថា ជនអន្តោប្រវេសន៍ប្រហែល ១.៤០០នាក់ បានស្លាប់ រហូតមកដល់ពេលនេះ ពេលព្យាយាមធ្វើដំណើរឆ្លងកាត់សមុទ្រមេឌីទែរ៉ាណេ ដើម្បីបានទៅដល់អឺរ៉ុប៕