នាព្រឹកថ្ងៃសុក្រ ទី២៤ ខែតុលា ឆ្នាំ២០២៥ ក្នុងកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាភិវឌ្ឍន៍កម្ពុជា បានដឹកនាំសហការីនៃក្រុមប្រឹក្សាអភិវឌ្ឍន៍កម្ពុជា ចូលរួមកិច្ចប្រជុំពិភាក្សាឆ្លង “សេចក្តីព្រាងរបាយការណ៍វឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជន (G-PSF) លើកទី១៩ ប្រចាំឆមាសទី១ ឆ្នាំ២០២៥”។ សេចក្តីព្រាងរបាយការណ៍នេះ ត្រូវបានទទួលការអនុម័តដ៏ខ្ពង់ខ្ពស់ពី កិច្ចប្រជុំពេញអង្គគណៈរដ្ឋមន្ត្រី និងត្រូវប្រកាសដាក់ឲ្យផ្សព្វផ្សាយជាសាធារណៈនាពេលឆាប់ៗខាងមុខ។ 

របាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញក្នុងវេទិកា G-PSF លើកទី១៩ ប្រចាំឆមាសទី១ ឆ្នាំ២០២៥ ជារបាយការណ៍ទី៣ ដែលក្រុមប្រឹក្សាអភិវឌ្ឍន៍កម្ពុជាបានរៀបចំឡើងបន្ទាប់ពីការដាក់ចេញ និងការប្រកាសផ្សព្វផ្សាយជាសាធារណៈនូវរបាយការណ៍ឆមាសទី១ និងឆមាសទី២ ឆ្នាំ២០២៤ កន្លងមក។ របាយការណ៍ដែលបានរៀបចំកន្លងមក មានគោលបំណងដោះស្រាយបញ្ហាជូនវិស័យឯកជន និងកាត់បន្ថយថ្លៃធ្វើធុរកិច្ច សំដៅបន្តលើកកម្ពស់ភាពប្រកួតប្រជែង និងជំរុញកំណើនសេដ្ឋកិច្ចជាតិ ដោយមានវិសាលភាពគ្រប់ដណ្ដប់លើវឌ្ឍនភាពនៃការអនុវត្តវិធានការមុតស្រួចជាកញ្ចប់ ដែលបានដាក់ចេញក្នុងវេទិកា G-PSF លើកទី១៩ តាមរយៈការដោះស្រាយបញ្ហាដែលលើកឡើងដោយវិស័យឯកជន ក្នុងកិច្ចប្រជុំក្រុមការងារតាមវិស័យ។ 

របាយការណ៍នេះ ក៏បានផ្ដល់ជាព័ត៌មានគ្រប់ជ្រុងជ្រោយពីវឌ្ឍនភាព និងគណនេយ្យភាពរបស់ក្រសួង ស្ថាប័នដែលទទួលបន្ទុកអនុវត្តវិធានការ និងជាពិសេសកិច្ចខិតខំប្រឹងប្រែងរបស់រាជរដ្ឋាភិបាលក្នុងការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ និងសំដៅជំរុញការបណ្តាក់ទុនវិនិយោគ និងពង្រីកគម្រោងវិនិយោគបន្ថែមទៀតនៅកម្ពុជា៕