រដ្ឋមន្ត្រីការបរទេសម៉ាឡេស៊ី នៅថ្ងៃសុក្រ (ទី២៤ ខែតុលា) នេះ បានលើកឡើងថា ផែនការរយៈពេល ៤ឆ្នាំរបស់អាស៊ាន (ASEAN) ដើម្បីឲ្យមានសន្តិភាព នៅសហភាពមីយ៉ាន់ម៉ាដែលហែកហួរដោយសង្រ្គាម មិនពិបាកក្នុងការអនុវត្តនោះឡើយ ហើយរបបយោធាកំពុងកាន់អំណាច គួរតែប្រកាន់ខ្ជាប់នូវផែនការនេះ និងអនុញ្ញាតឲ្យមានការផ្គត់ផ្គង់ជំនួយមនុស្សធម៌។ 

ជាមួយគ្នានេះ លោក Mohamad Hasan ក៏បាននិយាយផងដែរថា សមាគមប្រជាជាតិអាស៊ីអាគ្នេយ៍ ឬអាស៊ាននេះ មិនអាចបញ្ឈប់ការបោះឆ្នោតសកល នៅប្រទេសមីយ៉ាន់ម៉ាដែលត្រូវបានកំណត់ក្នុងខែធ្នូបានឡើយ ប៉ុន្តែរដ្ឋមន្ត្រីការបរទេសរបស់ប្លុកចង់ឲ្យមានការប្រកួតប្រជែង ប្រកបដោយយុត្តិធម៌ និងបរិយាបន្ន។

អាស៊ានបានយល់ស្របលើផែនការសន្តិភាព «Five-Point Consensus» (ការស្រុះស្រួលឯកច្ឆ័ន្ទ ៥ចំណុច) ជាមួយឧត្តមសេនីយ៍ជាន់ខ្ពស់របស់មីយ៉ាន់ម៉ា ពោលគឺប៉ុន្មានខែបន្ទាប់ពីការតវ៉ាប្រឆាំងរដ្ឋប្រហារឆ្នាំ២០២១ ប្រែក្លាយជាការបះបោរគ្រប់ទិសទីប្រឆាំងនឹងការគ្រប់គ្រងយោធា ប៉ុន្តែរបបយោធាត្រូវបានចោទប្រកាន់ថា ធ្វើមិនដឹងមិនឮ។

បន្ទាប់ពីមានកិច្ចប្រជុំជាមួយសមភាគីអាស៊ានរបស់លោក ក្នុងទីក្រុងគូឡាឡាំពួរ នៅមុនកិច្ចប្រជុំកំពូលមេដឹកនាំរបស់ប្លុក នៅចុងសប្តាហ៍នេះ លោក Mohamad បានប្រាប់អ្នកសារព័ត៌មានថា៖ «ផែនការ Five-Point Consensus គឺមិនពិបាកពេកនោះទេ (ក្នុងការអនុវត្ត)។ វាគឺជារឿងល្អប្រសើរណាស់ ក្នុងការមាននូវកិច្ចសន្ទនាគ្នា ដើម្បីអាចឲ្យជំនួយទៅដល់ប្រជាជន ហើយវិលត្រឡប់ទៅកាន់ការសន្ទនាជាមួយគ្រប់ភាគី»។

ផែនការសន្តិភាពនេះ បានបរាជ័យដោយភាគច្រើន ដោយសាររដ្ឋាភិបាលយោធា មិនមានឆន្ទៈក្នុងការបើកកិច្ចសន្ទនាជាមួយគូជម្លោះដែលខ្លួនចាត់ទុកថា ជា «ភេរវករ»៕