ប្រធានាធិបតីអ៊ុយក្រែនលោក Volodymyr Zelenskyy គ្រោងនឹងជួបជាមួយក្រុមមេដឹកនាំអឺរ៉ុប នៅចក្រភពអង់គ្លេស សម្រាប់ជំនួបពិភាក្សាលើជំនួយយោធា ដើម្បីទប់ស្កាត់ការវាយប្រហារនាពេលអនាគតរបស់រុស្ស៊ី បើសិនជាបទឈប់បាញ់បញ្ឈប់សង្រ្គាមដែលបច្ចុប្បន្នឈានដល់ឆ្នាំទី ៤ទៅហើយនោះ ។

លោក Zelenskyy និងនាយករដ្ឋមន្រ្តីអង់គ្លេសលោក Keir Starmer រំពឹងថានឹងត្រូវចូលរួមនៅការិយាល័យការបរទេសស្ថិតក្នុងទីក្រុងឡុងដ្រ៍ ដោយអគ្គលេខាធិការអង្គការណាតូលោក Mark Rutte នាយករដ្ឋមន្រ្តីដាណឺម៉ាកលោក Mette Frederiksen និងនាយករដ្ឋមន្រ្តីហូឡង់លោក Dick Schoof ។

មេដឹកនាំប្រហែល ២០នាក់ផ្សេងទៀត នឹងត្រូវចូលរួមតាមរយៈ Videolink នៅក្នុងជំនួប “Coalition of the Willing” គឺជាក្រុមប្រទេសដែលបានសន្យាពង្រឹងការគាំទ្រអ៊ុយក្រែន ។

ជំនួបនេះដែរ មានគោលបំណងដោះស្រាយវិធីសាស្រ្តជួយការពារការដាច់ចរន្តអគ្គិសនីអ៊ុយក្រែន ពីការវាយប្រហារយានដ្រូន និងមីស៊ីលរាល់ថ្ងៃរបស់រុស្ស៊ី ស្របពេលដែលរដូវរងាខិតជិតមកដល់ ការធ្វើឲ្យល្អប្រសើរឡើងការការពារដែនអាកាសអ៊ុយក្រែន និងការផ្គត់ផ្គង់ទីក្រុងគីវនូវមីស៊ីលរយៈចម្ងាយឆ្ងាយជាងនេះ ដែលអាចវាយប្រហារចូលកាន់តែជ្រៅទៅក្នុងប្រទេសរុស្ស៊ី ។

រុស្ស៊ីបានបង្កើនការទម្លាក់គ្រាប់បែករបស់ពួកគេលើអ៊ុយក្រែន ដោយមានគោលដៅលើតំបន់ស៊ីវិល ក៏ដូចជាហេដ្ឋារចនាសម្ព័ន្ធថាមពលមុនរដូវរងា ។

មកទល់នឹងពេលនេះ ប្រធានាធិបតីរុស្ស៊ីលោក Vladimir Putin មានះចំពោះកិច្ចខិតខំចរចាដោះស្រាយសន្តិភាពជាមួយលោក Zelenskyy ហើយលោកនិយាយជំទាស់ថា ការវាយលុយពេញបន្ទុករបស់រុស្ស៊ីលើប្រទេសតូចតាចជាងខ្លួនមួយនេះថា ស្របច្បាប់ ៕