ប្រទេសជប៉ុនបានឲ្យដឹងថា ខ្លួនបានប្រញាប់ប្រញាល់ពង្រាយយន្តហោះ នៅថ្ងៃសុក្រ (ទី២៤ ខែតុលា) នេះ ដើម្បីតាមដានយន្តហោះចម្បាំងរបស់រុស្ស៊ី ដែលក្នុងនោះរួមមានទាំងយន្តហោះទម្លាក់គ្រាប់បែកយុទ្ធសាស្ត្រអាចបំពាក់នុយក្លេអ៊ែរ បានហោះហើរកៀកនឹងដែនអាកាសជប៉ុន តាមបណ្ដោយលើឆ្នេររបស់ខ្លួន។

នៅក្នុងសេចក្តីថ្លែងការណ៍មួយដែលត្រូវបានរាយការណ៍ដោយទីភ្នាក់ងារសារព័ត៌មានរដ្ឋ RIA ក្រសួងការពារជាតិរុស្ស៊ី បានបញ្ជាក់ថា យន្តហោះទម្លាក់គ្រាប់បែក Tu-95 របស់ខ្លួន ត្រូវបានហោះអមដោយយន្តហោះមកពីប្រទេសមួយផ្សេងទៀត ក្នុងអំឡុងពេលដែលខ្លួនបានពិពណ៌នាថា ជាការហោះហើរល្បាតតាមទម្លាប់ នៅលើដែនទឹកអន្តរជាតិ។

ឧប្បត្តិហេតុនេះបានកើតឡើងប៉ុន្មានម៉ោងមុនពេលនាយករដ្ឋមន្ត្រីថ្មីរបស់ប្រទេសជប៉ុន គឺលោកស្រី Sanae Takaichi បានសន្យាពន្លឿនពង្រឹងវិស័យការពារជាតិ នៅក្នុងសុន្ទរកថាលើកដំបូងរបស់លោកស្រីទៅកាន់សភា ចាប់តាំងពីចូលកាន់តំណែង។ លោកស្រី Takaichi បាននិយាយថា សកម្មភាពយោធារបស់រុស្ស៊ី រួមជាមួយសម្ព័ន្ធមិត្តរបស់ប្រទេសនេះ កំពុងតែបង្កឲ្យមានក្ដីបារម្ភយ៉ាងខ្លាំង។

ក្រសួងការពារជាតិជប៉ុនបានបញ្ចេញផែនទី ដែលបង្ហាញពីផ្លូវហោះហើររបស់យន្តហោះរុស្ស៊ី នៅម្ដុំឆ្នេរភាគខាងលិចរបស់ប្រទេសជប៉ុន ពីលើសមុទ្រជប៉ុន។ ក្រសួងបានបញ្ជាក់ថា យន្តហោះទម្លាក់គ្រាប់បែក Tu-95 ២គ្រឿង ត្រូវបានហោះអមដោយយន្តហោះចម្បាំង Su-35 ២គ្រឿង ហើយដំបូងឡើយ បានហោះឆ្ពោះទៅកាន់កោះ Sado របស់ជប៉ុន មុនពេលបត់ឆ្ពោះទៅភាគខាងជើង៕