តុលាការកំពូលអេស្ប៉ាញ នាថ្ងៃសុក្រ (ទី២៤ ខែតុលា) នេះ បានប្រាប់ឲ្យដឹងថា ខ្លួនកំពុងស៊ើបអង្កេតលើក្រុមហ៊ុនផលិតដែក Sidenor ដែលគ្រប់គ្រងដោយឯកជន ដោយសង្ស័យថា បានលក់ដែកថែបទៅឲ្យក្រុមហ៊ុនរបស់អ៊ីស្រាអែល សម្រាប់គោលបំណងផលិតអាវុធ ដោយនេះអាចជាករណីផ្លូវច្បាប់ដំបូងគេ ពាក់ព័ន្ធនឹងការហាមឃាត់របស់ប្រទេសអេស្ប៉ាញ លើកិច្ចព្រមព្រៀងបែបនេះ។

យោងតាមសេចក្តីថ្លែងការណ៍មួយ បានឲ្យដឹងថា លោកចៅក្រម Francisco de Jorge កំពុងដឹកនាំការស៊ើបអង្កេតដែលផ្តោតលើនាយកប្រតិបត្តិក្រុមហ៊ុន Sidenor គឺលោក Jose Antonio Jainaga Gomez និងនាយកប្រតិបត្តិ ២នាក់ទៀត ជុំវិញការចោទប្រកាន់ពីបទរត់ពន្ធ និងពាក់ព័ន្ធ ក្នុងឧក្រិដ្ឋកម្មប្រឆាំងមនុស្សជាតិ ឬអំពើប្រល័យពូជសាសន៍។

ពួកគេត្រូវបានកោះហៅឲ្យទៅផ្តល់សក្ខីកម្មនៅថ្ងៃទី១២ ខែវិច្ឆិកា។ តុលាការបានឲ្យដឹងថា ក្រុមហ៊ុន Sidenor បានលក់ដែកថែបទៅឲ្យ Israel Military Industries ដែលជាក្រុមហ៊ុនបុត្រសម្ព័ន្ធរបស់ Elbit Systems នៅក្នុងកិច្ចព្រមព្រៀងមួយ ដែលត្រូវបានចោទប្រកាន់ថា បានធ្វើឡើងដោយគ្មានការអនុញ្ញាតពីរដ្ឋាភិបាល ឬការចុះបញ្ជីត្រឹមត្រូវ។

ពាក់ព័ន្ធនឹងករណីនេះ ក្រុមហ៊ុន Sidenor មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ហើយក្រុមហ៊ុន Elbit Systems ក៏បានបដិសេធមិនធ្វើអត្ថាធិប្បាយនោះដែរ៕