ឯកឧត្តម មាស គឹមហេង រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ និងជានាយកគ្រប់គ្រងគម្រោងមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង នាថ្ងៃទី២៣ ខែតុលា ឆ្នាំ២០២៥ បានអញ្ជើញដឹកនាំកិច្ចប្រជុំអន្តរក្រសួង ស្តីពី “ការអនុវត្តគម្រោង នៃកិច្ចសហប្រតិបត្តិការមេគង្គ-ឡានឆាងឆ្នាំ២០២៥” ជាមួយតំណាងក្រសួង និងស្ថាប័ន ដែលជាភ្នាក់ងារអនុវត្តគម្រោងចំនួន១១ ស្ថិតក្រោមមូលនិធិពិសេស នៃកិច្ចសហប្រតិបត្តិការមេគង្គ-ឡានឆាងឆ្នាំ២០២៥ នៅទីស្តីការក្រសួង។ 

គម្រោងទាំង១១ នេះនឹងផ្ដល់ផលប្រយោជន៍ជាច្រើននៅតាមវិស័យផ្សេងៗ រួមមាន៖ ទេសចរណ៍ សុខាភិបាល កសិកម្ម ការអភិរក្សនិងការស្តារឡើងវិញនូវតំបន់វប្បធម៌ ការអភិវឌ្ឍសហគ្រិនភាពស្ត្រី ការអប់រំបណ្ដុះបណ្ដាលបច្ចេកទេស និងវិជ្ជាជីវៈ ការលើកកម្ពស់ផលិតភាព និងការចាប់យកបច្ចេកវិទ្យាសម្រាប់សហគ្រាសមីក្រូ ធុនតូច និងមធ្យម និងការលុបបំបាត់ព័ត៌មានក្លែងក្លាយ ក៏ដូចជាការលើកកម្ពស់ការយល់ដឹងពីកិច្ចសហប្រតិបត្តិការមេគង្គ-ឡានឆាង។

កិច្ចប្រជុំបានពិភាក្សាអំពីវឌ្ឍនភាព នៃកិច្ចសហប្រតិបត្តិការមេគង្គ-ឡានឆាង ព្រមទាំងផ្តោតសំខាន់លើនីតិវិធីរួមបច្ចុប្បន្នកម្មសម្រាប់ការអនុវត្តគម្រោងហិរញ្ញប្បទានសហប្រតិបត្តិការពីដៃគូអភិវឌ្ឍន៍ និងស្របតាមនីតិវិធីលទ្ធកម្ម ដែលជាភាពចាំបាច់ក្នុងការធានានូវប្រសិទ្ធភាពនៃការអនុវត្តគម្រោង សង្គតិភាព នៃបទដ្ឋាន ការកំណត់នូវតួនាទី ការទទួលខុសត្រូវ និងគណនេយ្យភាពរបស់ភ្នាក់ងារអនុវត្តគម្រោង៕