សមាជិកសម្ព័ន្ធយោធាណាតូគឺប្រទេសលីទុយអានី បានបិទអាកាសយានដ្ឋានធំបំផុតចំនួនពីរកន្លែងរបស់ខ្លួន និងបិទច្រកឆ្លងកាត់នៅតាមព្រំដែនរបស់ខ្លួនជាមួយប្រទេសបេឡារុស បន្ទាប់ពីបានឃើញបាឡុងអង្កេតអាកាសធាតុបញ្ចូលឧស្ម័នហែលីយ៉ូមបានហោះរសាត់ចូលទៅក្នុងទឹកដីរបស់ខ្លួន ជាឧបទ្ទវហេតុលើកទីបីនៅក្នុងប្រទេសតំបន់បាល់ទិកមួយនេះ នៅក្នុងខែនេះ។

ទីភ្នាក់ងារអាកាសចរណ៍អ៊ឺរ៉ុប បានជួបភាពវឹកវរម្តងហើយម្តងទៀតក្នុងប៉ុន្មានសប្តាហ៍ថ្មីៗនេះ ដោយការមើលឃើញយានដ្រូន និងការលុកលុយដែនអាកាសផ្សេងៗទៀត រួមទាំងនៅអាកាសយានដ្ឋានទីក្រុង Copenhagen ទីក្រុងMunich និងតំបន់បាល់ទិក។

អាជ្ញាធរបាននិយាយថា អាកាសយានដ្ឋាន Vilnius និង Kaunas ត្រូវបានបិទ កាលពីថ្ងៃសុក្រសម្រាប់ហេតុផលសុវត្ថិភាពរហូតដល់ម៉ោង២ព្រឹកម៉ោងក្នុងតំបន់ ខណៈច្រកព្រំដែនជាប់ប្រទេសបេឡារុសនឹងនៅតែបិទ។

ប្រទេសលីទុយអានី បាននិយាយថា បាឡុងត្រូវបានបញ្ជូនដោយអ្នករត់ពន្ធដឹកជញ្ជូនបារីខុសច្បាប់ ប៉ុន្តែប្រទេសនេះក៏បានដាក់កំហុសលើប្រធានាធិបតីបេឡារុស លោក Alexander Lukashenko ដែលជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ី លោក Vladimir Putin ចំពោះការមិនបញ្ឈប់សកម្មភាពនេះ។

មជ្ឈមណ្ឌលគ្រប់គ្រងវិបត្តិជាតិរបស់ប្រទេសលីទុយអានី បាននិយាយថា បាឡុងរាប់សិប ត្រូវបានរកឃើញដោយរ៉ាដាកាលពីថ្ងៃសុក្រ។ អាជ្ញាធរបាននិយាយថា អាកាសយានដ្ឋាន Vilnius ក៏បានបិទកាលពីថ្ងៃអង្គារសប្តាហ៍នេះ និងនៅថ្ងៃទី៥ ខែតុលា នៅពេលដែលបាឡុងរត់ពន្ធជាច្រើន ចូលមកក្នងដែនអាកាសរបស់រដ្ឋធានី។