សហរដ្ឋអាមេរិក នឹងបញ្ជូនក្រុមវាយប្រហារនៃនាវាផ្ទុកយន្តហោះទៅកាន់អាមេរិកឡាទីន ជាការកើនឡើងដ៏ច្រើននៃវត្តមានយោធារបស់ខ្លួននៅក្នុងតំបន់ ក្នុងពេលមានការរំពឹងទុកនៃកិច្ចខិតខំប្រឹងប្រែងដែលអាចមានដើម្បីផ្តួលរំលំរដ្ឋាភិបាលវេណេស៊ុយអេឡា។

អ្នកនាំពាក្យយោធាសហរដ្ឋអាមេរិក បាននិយាយកាលពីថ្ងៃសុក្រថា រដ្ឋមន្ត្រីការពារជាតិ លោក Pete Hegseth បានបញ្ជាឱ្យនាវា USS Gerald Ford និងនាវាពិឃាតចំនួន៥គ្រឿងនៅក្នុងក្រុមវាយប្រហារ អម ទៅកាន់អាមេរិកឡាទីន។

អ្នកនាំពាក្យមន្ទីរបញ្ចកោណ លោក Sean Parnell បាននិយាយនៅក្នុងសារបង្ហោះលើបណ្តាញផ្សព្វផ្សាយសង្គមថា «វត្តមានកងកម្លាំងរបស់សហរដ្ឋអាមេរិកដែលត្រូវបានបង្កើន នឹងពង្រឹងសមត្ថភាពរបស់សហរដ្ឋអាមេរិកក្នុងការរកឃើញ ត្រួតពិនិត្យ និងបង្អាក់ដល់សកម្មភាពខុសច្បាប់នានា ដែលធ្វើឲ្យប៉ះពាល់ដល់សុវត្ថិភាពនិងវិបុលភាពនៃមាតុភូមិរបស់សហរដ្ឋអាមេរិក ព្រមទាំងសន្តិសុខរបស់យើងនៅអឌ្ឍគោលខាងលិច»។

ប៉ុន្តែការដាក់ពង្រាយនេះ បង្ហាញពីកម្រិតនៃកម្លាំងយោធាហួសពីគោលដៅដែលរដ្ឋបាលលោក Trump បានកំណត់ក្នុងការប្រយុទ្ធប្រឆាំងការជួញដូរគ្រឿងញៀន ហើយបានធ្វើឡើងខណៈសហរដ្ឋអាមេរិកប្រកាន់យកបន្ទាត់ប្រកាន់តឹងកាន់តែខ្លាំងឡើងប្រឆាំងទីក្រុង Caracas ។ សហរដ្ឋអាមេរិកមាននាវិក និងកងម៉ារីនប្រហែល៦.០០០នាក់រួចហើយនៅក្នុងតំបន់នៅលើនាវាចម្បាំងចំនួន៨គ្រឿង ដែលបច្ចុប្បន្នត្រូវបានចូលរួមដោយនាវា USS Gerald Ford និងនាវាពិឃាតទាំង៥គ្រឿងនៅក្នុងក្រុមវាយប្រហាររបស់ខ្លួន រួមជាមួយនឹងបុគ្គលិកបន្ថែមចំនួន៤.៥០០នាក់។ បច្ចុប្បន្ននាវាផ្ទុកយន្តហោះនេះ ស្ថិតនៅក្នុងសមុទ្រមេឌីទែរ៉ាណេ ហើយវាមិនច្បាស់នោះទេថា នៅពេលណាដែលនាវានឹងទៅដល់អាមេរិកឡាទីន។