នៅព្រឹកថ្ងៃទី២៥ ខែតុលា ឆ្នាំ២០២៥នេះ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន នៅទីក្រុងគូឡាឡាំពួ ប្រទេសម៉ាឡេស៊ី។

នៅក្នុងកិច្ចប្រជុំ ប្រទេសសមាជិកអាស៊ានបានទទួលស្គាល់ភាពជោគជ័យនៃការអនុវត្តផែនការលម្អិតស្តីពីសហគមន៍នយោបាយ-សន្តិសុខអាស៊ាន ឆ្នាំ២០២៥ ដែលជាមូលដ្ឋានគ្រឹះក្នុងការជំរុញអាស៊ានឱ្យទៅជាសហគមន៍មួយដែលប្រកបដោយបរិយាបន្ន និងភាពធន់។

អំឡុងពេលថ្លែងបទអន្តរាគមន៍ ឯកឧត្តមឧបនាយករដ្ឋមន្ត្រី ប្រាក់ សុខុន បានសង្កត់ធ្ងន់ពីតម្រូវការនៃកិច្ចសន្ទនាដោយសន្តិវិធី និងកិច្ចសហប្រតិបត្តិការប្រកបដោយស្ថាបនាជាមួយដៃគូអាស៊ានទាំងអស់ ដើម្បីកសាងទំនុកចិត្តគ្នាទៅវិញទៅមក និងដោះស្រាយក្តីកង្វល់រួម។