ប្រធានាធិបតីអាមេរិក លោក Donald Trump បាននិយាយកាលថ្ងៃសុក្រ (ទី២៤ ខែតុលា)ថា លោកចង់ជួបជាមួយមេដឹកនាំកូរ៉េខាងជើង លោក Kim Jong Un នាសប្តាហ៍ក្រោយ ស្របពេលមានការរំពឹងទុកកាន់តែខ្លាំងឡើងអំពីលទ្ធភាពនៃជំនួបនេះ ខណៈដែលមេដឹកនាំអាមេរិក ស្ថិតនៅក្នុងប្រទេសកូរ៉េខាងត្បូង ដើម្បីចូលរួមកិច្ចប្រជុំកំពូលកិច្ចសហប្រតិបត្តិការអាស៊ី-ប៉ាស៊ីហ្វិក (APEC)។

លោក Trump បានធ្វើការកត់សម្គាល់បែបនេះ នៅពេលនិយាយទៅកាន់ក្រុមអ្នកសារព័ត៌មាន មុនពេលចេញដំណើរទៅប្រទេសម៉ាឡេស៊ី ដែលជាការឈប់សំចតដំបូងនៃដំណើរទស្សនកិច្ច ៣ប្រទេសរបស់លោក នៅតំបន់អាស៊ី។ នៅឯសេតវិមាន នៅពេលត្រូវបានសួរថា តើលោកមានគម្រោងជួបលោក Kim ដែរ ឬទេ លោកបានឆ្លើយប្រាប់អ្នកសារព័ត៌មានថា៖ «ខ្ញុំមិនច្បាស់ទេ។ យើងបានឲ្យគាត់ (លោក Kim) ដឹង។ គាត់ដឹងថា ខ្ញុំនឹងទៅទីនោះ។ ខ្ញុំចង់ (ជួប)។ ខ្ញុំចុះសម្រុងល្អណាស់ជាមួយគាត់»។

គួរបញ្ជាក់ថា លោក Trump គ្រោងនឹងធ្វើដំណើរទៅដល់កូរ៉េខាងត្បូង នៅថ្ងៃទី២៩ ខែតុលា ហើយវិលត្រឡប់ទៅទីក្រុងវ៉ាស៊ីនតោនវិញនៅថ្ងៃបន្ទាប់ បន្ទាប់ពីបានជួបប្រជុំទ្វេភាគីជាមួយប្រធានាធិបតីកូរ៉េខាងត្បូង លោក Lee Jae-myung និងប្រធានាធិបតីចិន លោក Xi Jinping។

តែយ៉ាងណាក្ដី អ្នករាយការណ៍ព័ត៌មានផ្លូវការរបស់សហរដ្ឋអាមេរិកមួយរូប កាលពីថ្ងៃសុក្រ បានឲ្យដឹងថា កិច្ចប្រជុំមួយ គឺ «មិនស្ថិតនៅក្នុងកាលវិភាគ សម្រាប់ដំណើរទស្សនកិច្ចនេះទេ» ទោះបីជាលោក Trump បានបង្ហាញពីឆន្ទៈរបស់លោក ក្នុងការជួបជាមួយលោក Kim Jong Un នាពេលខាងមុខក៏ដោយ៕