សហរដ្ឋអាមេរិក កាលពីថ្ងៃសុក្រ (ទី២៤ ខែតុលា) បានដាក់ទណ្ឌកម្មលើប្រធានាធិបតីកូឡុំប៊ី លោក Gustavo Petro ដោយចោទប្រកាន់លោកពីបទបដិសេធមិនបញ្ឈប់កុំឲ្យមានលំហូរកូកាអ៊ីនទៅកាន់សហរដ្ឋអាមេរិក ខណៈដែលក្រុងវ៉ាស៊ីនតោន បង្កើនសម្ពាធលើមេដឹកនាំនៃប្រទេសតំបន់អាមេរិកឡាទីនមួយនេះ ដែលបានប៉ះទង្គិចជាមួយលោកប្រធានាធិបតី Donald Trump។

ចំណាត់ការនេះ គឺជាការបង្ហាញនូវកម្រិតទាបថ្មី នៅក្នុងទំនាក់ទំនងរវាងប្រទេសទាំង២។ លោក Trump បានចោទប្រកាន់ទីក្រុង Bogota ថា បានចូលដៃជាមួយការជួញដូរគ្រឿងញៀនខុសច្បាប់។ ការដាក់ទណ្ឌកម្មដ៏កម្រ តែធ្លាប់មានរបស់សហរដ្ឋអាមេរិក លើប្រមុខរដ្ឋនេះ បានបន្ថែមលោក Petro ទៅក្នុងបញ្ជីឈ្មោះ ដែលរួមមានមេដឹកនាំរុស្ស៊ី វ៉េណេស៊ុយអេឡា និងកូរ៉េខាងជើង។

រដ្ឋមន្ត្រីក្រសួងរតនាគារ លោក Scott Bessent បានឲ្យដឹងនៅក្នុងសេចក្តីថ្លែងការណ៍មួយថា៖ «ចាប់តាំងពីលោកប្រធានាធិបតី Gustavo Petro ឡើងកាន់អំណាច ការផលិតកូកាអ៊ីន នៅក្នុងប្រទេសកូឡុំប៊ី បានកើនឡើងដល់កម្រិតខ្ពស់បំផុត ក្នុងរយៈពេលជាច្រើនទសវត្សរ៍មកនេះ ដោយមានពោរពាសពេញសហរដ្ឋអាមេរិក និងពង្វក់ប្រជាជនអាមេរិក»។

តាមរយៈសេចក្ដីថ្លែងការណ៍នោះ លោក Bessent បានបន្ថែមថា៖ «លោកប្រធានាធិបតី Petro បានបណ្ដោយឲ្យក្រុមជួញដូរគ្រឿងញៀនកើតឡើងព្រោងព្រាត ហើយបដិសេធមិនបញ្ឈប់សកម្មភាពនេះ។ ថ្ងៃនេះ លោកប្រធានាធិបតី Trump កំពុងចាត់វិធានការយ៉ាងម៉ឺងម៉ាត់ ដើម្បីការពារជាតិរបស់យើង ហើយបញ្ជាក់យ៉ាងច្បាស់លាស់ថា យើងនឹងមិនអត់ឱនអំពើជួញដូរគ្រឿងញៀនចូលប្រទេសរបស់យើងឡើយ»។

ចំណែកលោក Petro បានលើកឡើងតាមរយៈការបង្ហោះនៅលើបណ្ដាញសង្គម X ថា លោកបានប្រឹងប្រែងប្រយុទ្ធប្រឆាំងនឹងការជួញដូរគ្រឿងញៀនជាច្រើនទសវត្សរ៍មកហើយ។ 

គួរបញ្ជាក់ថា លោក Trump និងលោក Petro បានប៉ះទង្គិចគ្នាជាច្រើនលើក ចាប់តាំងពីប្រធានាធិបតីអាមេរិកទៅពីគណបក្សសាធារណរដ្ឋចូលកាន់តំណែង ក្នុងខែមករា ក្នុងនោះរួមទាំងការមានជម្លោះកាន់តែខ្លាំងឡើងៗ ដែលផ្តើមចេញពីការវាយប្រហារដោយយោធាអាមេរិកលើនាវាដែលសង្ស័យថា ដឹកជញ្ជូនគ្រឿងញៀន នៅក្នុងតំបន់ផងដែរ៕