ក្រុមនយោបាយសំខាន់ៗរបស់ប៉ាឡេស្ទីន ក្នុងនោះរួមមានទាំងក្រុមហាម៉ាសផងដែរ កាលពីថ្ងៃសុក្រ (ទី២៤ ខែតុលា) បានឲ្យដឹងថា ពួកគេបានយល់ព្រមថា គណៈកម្មាធិការឯករាជ្យនៃក្រុមជំនាញបច្ចេកទេស នឹងគ្រប់គ្រងដំណើរការតំបន់ហ្កាហ្សាក្រោយសង្គ្រាម។

យោងតាមសេចក្តីថ្លែងការណ៍រួមមួយដែលត្រូវបានចេញផ្សាយនៅលើគេហទំព័ររបស់ក្រុមហាម៉ាស បានឲ្យដឹងថា ក្នុងអំឡុងពេលកិច្ចប្រជុំ នៅទីក្រុងគែរ ប្រទេសអេហ្ស៊ីប ក្រុមនយោបាយទាំងនោះ បានយល់ព្រមប្រគល់ «ការគ្រប់គ្រងតំបន់ហ្កាហ្សាស្ទ្រីបទៅឲ្យគណៈកម្មាធិការបណ្តោះអាសន្នរបស់ប៉ាឡេស្ទីនដែលមានសមាសភាពនៃអ្នកជំនាញបច្ចេកទេសឯករាជ្យ»។

សេចក្ដីថ្លែងការណ៍បានបញ្ជាក់ថា គណៈកម្មាធិការនេះ នឹង «គ្រប់គ្រងកិច្ចការនៃជីវិតរស់នៅប្រចាំថ្ងៃ និងសេវាកម្មជាមូលដ្ឋាន ដោយសហការជាមួយប្រទេសបងប្អូនអារ៉ាប់ និងស្ថាប័នអន្តរជាតិ»។ ហើយសេចក្តីថ្លែងការណ៍ក៏បានបន្ថែមទៀតផងដែរថា ក្រុមទាំងនោះបានយល់ព្រមធ្វើការ ពាក់ព័ន្ធនឹងការបង្រួបបង្រួមជំហររួមមួយ «ដើម្បីដោះស្រាយបញ្ហាប្រឈមនានាដែលបុព្វហេតុប៉ាឡេស្ទីន កំពុងជួបប្រទះ»។

សេចក្ដីថ្លែងការណ៍បានអំពាវនាវឲ្យមានកិច្ចប្រជុំនៃកងកម្លាំង និងក្រុមនយោបាយទាំងអស់ ដើម្បី «ព្រមព្រៀងលើយុទ្ធសាស្ត្រជាតិ និងធ្វើឲ្យអង្គការរំដោះប៉ាឡេស្ទីន (PLO) រស់ឡើងវិញ ដែលជាតំណាងស្របច្បាប់តែមួយគត់របស់ប្រជាជនប៉ាឡេស្ទីន»។ ក្រុមហាម៉ាសមិនមែនជាផ្នែកនៃ PLO ដែលត្រូវបានគ្រប់គ្រងដោយគូប្រជែងដ៏យូរអង្វែងរបស់ខ្លួន គឺក្រុម Fatah។

ប្រភពព័ត៌មានមួយ បានប្រាប់សារព័ត៌មានកាលពីថ្ងៃព្រហស្បតិ៍ថា គណៈប្រតិភូមកពីក្រុមហាម៉ាស និងក្រុម Fatah បានជួបប្រជុំគ្នានៅទីក្រុងគែរ ដើម្បីពិភាក្សាដំណាក់កាលទី២ នៃផែនការបទឈប់បាញ់ដែលគាំទ្រដោយសហរដ្ឋអាមេរិក នៅតំបន់ហ្កាហ្សា៕