ក្រុមអ្នកចរចាអាហ្វហ្គានីស្ថាន និងប៉ាគីស្ថាន នឹងជួបប្រជុំគ្នានៅទីក្រុងអ៊ីស្តង់ប៊ុល ប្រទេសទួរគី នាថ្ងៃសៅរ៍ (ទី២៥ ខែតុលា) នេះ ដើម្បីដោះស្រាយបញ្ហាសន្តិសុខ និងបង្កើតបទឈប់បាញ់យូរអង្វែង នៅតាមព្រំដែនរួមគ្នារបស់ប្រទេសទាំង២ បន្ទាប់ពីមានការផ្ទុះឡើងនូវជម្លោះបង្ហូរឈាមដែលមិននឹកស្មានដល់។

ការប្រឈមមុខដាក់គ្នា ដែលបណ្តាលឲ្យមនុស្សរាប់សិបនាក់បាត់បង់ជីវិត ក្នុងចំណោមនោះមានជនស៊ីវិលផងដែរ បានចាប់ផ្តើមកាលពី ២សប្តាហ៍មុន បន្ទាប់ពីមានការផ្ទុះនៅកណ្តាលទីក្រុងកាប៊ុលដែលរដ្ឋាភិបាលតាលីបង់ បានចោទថា ជាស្នាដៃរបស់ប្រទេសជិតខាងរបស់ខ្លួន គឺប៉ាគីស្ថាន ហើយបានបើកការវាយលុកសងសឹក នៅតាមព្រំដែន។

ប្រភពសន្តិសុខ បានឲ្យដឹងថា ដោយប្តេជ្ញាឆ្លើយតបយ៉ាងខ្លាំងក្លា ទីក្រុងអ៊ីស្លាម៉ាបាដ បន្ទាប់មកបានធ្វើ «ការវាយប្រហារដោយដាក់គោលដៅយ៉ាងជាក់លាក់» ប្រឆាំងនឹងក្រុមប្រដាប់អាវុធនៅដែនដីអាហ្វហ្គានីស្ថាន ដែលជាចំណុចសំខាន់នៃការផ្ទុះជម្លោះនេះ។

បន្ទាប់ពីការប៉ះទង្គិចគ្នាបន្ថែមទៀតដែលធ្វើឲ្យទាហាន និងជនស៊ីវិលស្លាប់ ភាគីទាំង២ បានប្រកាសបទឈប់បាញ់រយៈពេល ៤៨ម៉ោងដំបូង ដែលបានដួលរលំ ២ថ្ងៃក្រោយមក ដោយទីក្រុងកាប៊ុល បានបន្ទោសទីក្រុងអ៊ីស្លាម៉ាបាដ។ បទឈប់បាញ់លើកទី២ បានលេចជារូបរាង កាលពីថ្ងៃអាទិត្យចុងសប្ដាហ៍កន្លងមក បន្ទាប់ពីមានកិច្ចចរចា នៅទីក្រុងដូហា ដោយត្រូវបានសម្របសម្រួលដោយប្រទេសកាតា និងទួរគី ដែលហាក់ដូចជាបានចូលជាធរមាន ទោះបីជាលក្ខខណ្ឌនៅតែមិនច្បាស់លាស់ក៏ដោយ។

នៅក្នុងកិច្ចពិភាក្សា នាថ្ងៃសៅរ៍នេះ ក្រុមអ្នកចរចាត្រូវបានគេរំពឹងថា នឹងលម្អិត អំពី «យន្តការ» សម្រាប់ធានាការវិលត្រឡប់ទៅរកស្ថិរភាព ដែលត្រូវបានប្រកាស នៅក្នុងទីក្រុងដូហា។ យ៉ាងណាក្ដី គេមិនទាន់ច្បាស់នោះទេថា តើការចរចានឹងចាប់ផ្តើមនៅពេលណា ឬនៅទីណា ពេលក្រុមតំណាងនៃភាគីទាំង២ ជួបប្រជុំនៅទីក្រុងអ៊ីស្តង់ប៊ុល ប្រទេសទួរគីនេះ៕