មន្ត្រីយោធាអ៊ីស្រាអែល និងអាមេរិក បានឲ្យដឹងថា យោធាអាមេរិក បានចាប់ផ្តើមប្រតិបត្តិការបង្ហោះយានដ្រូន នៅតំបន់ហ្កាហ្សាស្ទ្រីប នៅប៉ុន្មានថ្ងៃថ្មីៗនេះ ដែលជាផ្នែកនៃកិច្ចប្រឹងប្រែងដ៏ទូលំទូលាយ ដើម្បីធានាថា ទាំងអ៊ីស្រាអែល និងក្រុមហាម៉ាស ប្រកាន់ខ្ជាប់នូវកិច្ចព្រមព្រៀងបទឈប់បាញ់ដ៏ផុយស្រួយ។

ដោយនិយាយក្នុងលក្ខខណ្ឌមិនបញ្ចេញឈ្មោះ ដើម្បីពិភាក្សាលម្អិតប្រតិបត្តិការនេះ មន្ត្រីយោធាអ៊ីស្រាអែល ២រូប និងមន្ត្រីការពារជាតិអាមេរិកម្នាក់ បានឲ្យដឹងថា យានដ្រូនត្រូវបានប្រើប្រាស់ ដើម្បីតាមដានសកម្មភាពលើដី នៅក្នុងតំបន់ហ្កាហ្សា ដោយមានការព្រមព្រៀងពីអ៊ីស្រាអែល។ ពួកគេបានបញ្ជាក់ថា ពួកគេមិនអាចចែករំលែកផ្លូវហោះហើររបស់យានដ្រូនបានទេ។

មន្ត្រីទាំង ៣នាក់នោះ បានបន្ថែមថា បេសកកម្មឃ្លាំមើល កំពុងដំណើរការ ដើម្បីជួយដល់មជ្ឈមណ្ឌលសម្របសម្រួលស៊ីវិល-យោធាថ្មី នៅភាគខាងត្បូងអ៊ីស្រាអែល ដែលត្រូវបានបង្កើតឡើង កាលពីសប្តាហ៍មុន ដោយទីបញ្ជាការកណ្តាលរបស់យោធាអាមេរិក ជាផ្នែកមួយ ដើម្បីតាមដានបទឈប់បាញ់។

គួរបញ្ជាក់ថា កិច្ចព្រមព្រៀងបទឈប់បាញ់ដែលសម្របសម្រួលដោយអ្នកសម្រុះសម្រួលសហរដ្ឋអាមេរិក កាតា និងអេហ្ស៊ីប កាលពីដើមខែតុលា ស្ថិតក្នុងភាពតានតឹងដោយសារការផ្ទុះឡើងនូវអំពើហិង្សា នាពេលថ្មីៗនេះ នៅតំបន់ហ្កាហ្សា និងការមិនចុះសម្រុងដែលកំពុងបន្តមាន ជុំវិញការដោះដូរជនជាតិអ៊ីស្រាអែល និងប៉ាឡេស្ទីនដែលបានបាត់បង់ជីវិត៕