បណ្តាប្រទេសនានា បានចុះហត្ថលេខាលើសន្ធិសញ្ញាដំបូងរបស់អង្គការសហប្រជាជាតិ (UN) ដែលកំណត់គោលដៅលើឧក្រិដ្ឋកម្មតាមប្រព័ន្ធអ៊ីនធឺណិត នៅទីក្រុងហាណូយ ប្រទេសវៀតណាម នាថ្ងៃសៅរ៍ (២៥ តុលា) បើទោះបីជាមានការប្រឆាំងពីក្រុមបច្ចេកវិជ្ជា និងក្រុមសិទ្ធិមនុស្សមួយចំនួន ដែលព្រមានថា នឹងជួយដល់ការឃ្លាំមើលបន្ថែមរបស់រដ្ឋក៏ដោយ។

ក្របខ័ណ្ឌច្បាប់សកលថ្មីនេះ មានគោលបំណងពង្រឹងកិច្ចសហប្រតិបត្តិការអន្តរជាតិ ដើម្បីប្រយុទ្ធប្រឆាំងនឹងឧក្រិដ្ឋកម្មឌីជីថល រាប់ចាប់ពីរូបភាពអាសអាភាសកុមារ រហូតដល់ការបោកប្រាស់តាមប្រព័ន្ធអ៊ីនធឺណិតឆ្លងដែន និងការសម្អាតលុយកខ្វក់។

សមាជិក UN ជាង ៦០ប្រទេស ត្រូវបានគេឃើញចុះហត្ថលេខាលើសេចក្តីប្រកាស នៅថ្ងៃសៅរ៍នេះ ដែលមានន័យថា វានឹងចូលជាធរមាននៅពេលដែលត្រូវបានផ្តល់សច្ចាប័នដោយរដ្ឋទាំងនោះ។ អគ្គលេខាធិការ UN លោក Antonio Guterres បានពណ៌នាការចុះហត្ថលេខានេះថា ជា «ព្រឹត្តិការណ៍ដ៏សំខាន់» ប៉ុន្តែថា វាគឺ «គ្រាន់តែជាការចាប់ផ្តើមប៉ុណ្ណោះ»។

អនុសញ្ញា UN ប្រឆាំងនឹងឧក្រិដ្ឋកម្មតាមប្រព័ន្ធអ៊ីនធឺណិត ត្រូវបានស្នើឡើងជាលើកដំបូង ដោយអ្នកការទូតរុស្ស៊ី ក្នុងឆ្នាំ២០១៧ ហើយត្រូវបានអនុម័តជាឯកច្ឆន្ទ កាលពីឆ្នាំមុន បន្ទាប់ពីមានការចរចាយ៉ាងយូរ។ តែយ៉ាងណាក្ដី ក្រុមអ្នករិះគន់ លើកឡើងថា ការប្រើប្រាស់ភាសាដ៏ទូលំទូលាយ ពោលគឺមិនច្បាស់លាស់ អាចនាំឲ្យមានការរំលោភអំណាច និងបើកការគាបសង្កត់ពីរដ្ឋាភិបាល៕