រដ្ឋបាលរបស់ប្រធានាធិបតីអាមេរិក លោក Donald Trump បានរៀបចំទណ្ឌកម្មបន្ថែម ដែលខ្លួនអាចប្រើ ដើម្បីកំណត់គោលដៅលើវិស័យសំខាន់ៗនៃសេដ្ឋកិច្ចរបស់រុស្ស៊ី ប្រសិនបើប្រធានាធិបតី លោក Vladimir Putin បន្តពន្យារពេលបញ្ចប់សង្គ្រាមរបស់ទីក្រុងមូស្គូ នៅក្នុងប្រទេសអ៊ុយក្រែន។ នេះបើយោងតាមការឲ្យដឹងពីមន្ត្រីអាមេរិក និងបុគ្គលម្នាក់ទៀតដែលដឹងពីបញ្ហានេះ។

មន្ត្រីអាមេរិក ២រូប បានឲ្យដឹងថា ជាមួយគ្នានេះ មន្ត្រីអាមេរិក ក៏បានប្រាប់សមភាគីអឺរ៉ុបថា ពួកគេគាំទ្រសហភាពអឺរ៉ុប (EU) ប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីទិញអាវុធអាមេរិកផ្ដល់ឲ្យទីក្រុងគីវ ហើយទីក្រុងវ៉ាស៊ីនតោន បានចាប់ផ្ដើមធ្វើការសន្ទនាផ្ទៃក្នុង អំពីការទាញយកទ្រព្យសម្បត្តិរបស់រុស្ស៊ីដែលមាននៅសហរដ្ឋអាមេរិក ដើម្បីគាំទ្រដល់កិច្ចប្រឹងប្រែងធ្វើសង្គ្រាមរបស់អ៊ុយក្រែន។

បើទោះបីជាវាមិនទាន់ច្បាស់លាស់ថា តើទីក្រុងវ៉ាស៊ីនតោន នឹងអនុវត្តវិធានការណាមួយភ្លាមៗក៏ដោយ ក៏វាបង្ហាញថា មានកញ្ចប់ឧបករណ៍ដែលត្រូវបានរៀបចំយ៉ាងល្អនៅក្នុងរដ្ឋបាលនេះរួចហើយ ដើម្បីបង្កើនសម្ពាធបន្ថែមទៀត បន្ទាប់ពីលោក Trump បានដាក់ទណ្ឌកម្មលើរុស្ស៊ី កាលពីថ្ងៃទី២២ ខែតុលា ដែលជាលើកដំបូង គិតចាប់តាំងពីការវិលត្រឡប់មកកាន់តំណែង ក្នុងខែមករា។

លោក Trump បានតាំងខ្លួនលោកថា ជាអ្នកបង្កើតសន្តិភាពពិភពលោក ប៉ុន្តែបានទទួលស្គាល់ថា ការព្យាយាមបញ្ចប់សង្រ្គាមដែលអូសបន្លាយពេលជាង ៣ឆ្នាំរបស់រុស្ស៊ី នៅក្នុងប្រទេសជិតខាងអ៊ុយក្រែន បានបង្ហាញឲ្យឃើញពីការលំបាកជាងអ្វីដែលលោកបានរំពឹងទុក។

សម្ព័ន្ធមិត្តអ៊ឺរ៉ុប ដែលរងប៉ះពាល់ដោយសារការប្រែប្រួលរបស់លោក Trump រវាងការសម្របសម្រួល និងការខឹងសម្បាជាមួយលោក Putin សង្ឃឹមថា លោកនឹងបន្តដាក់សម្ពាធលើទីក្រុងមូស្គូ ហើយក៏កំពុងពិចារណាលើវិធានការសំខាន់ៗរបស់ខ្លួនផងដែរ។

យ៉ាងណាក្ដី មន្ត្រីជាន់ខ្ពស់អាមេរិកម្នាក់ បានប្រាប់សារព័ត៌មាន Reuters ថា លោកចង់ឃើញសម្ព័ន្ធមិត្តអឺរ៉ុប ដាក់ចេញនូវវិធានការដ៏ធំបន្ទាប់ លើរុស្ស៊ី ដែលអាចជាការដាក់ទណ្ឌកម្មបន្ថែម ឬការដំឡើងពន្ធកាន់តែខ្ពស់៕