ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថា ក្រសួងបានបន្តរៀបចំ និងសហការរៀបចំឯកសារ ដើម្បីស្នើសុំចុះ “ប្រាសាទកោះកេរ” “នំបញ្ចុក” “ក្បាច់គុនល្បុក្កតោ” និង “ទីក្រុងបាត់ដំបង” ទៅក្នុងបញ្ជីបេតិកភណ្ឌពិភពលោក, បញ្ជីបេតិកភណ្ឌវប្បធម៌អរូបីនៃមនុស្សជាតិ។

ការថ្លែងរបស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រ សិល្បៈ យ៉ាងដូច្នេះ ក្នុងសន្និបាតបូកសរុបការងារវប្បធម៌ និងវិចិត្រសិល្បៈឆ្នាំ២០២១ និងលើក ទិសដៅការងារសម្រាប់ឆ្នាំ២០២២ នៅ​សាល​សន្និសីទ​ចតុមុខ​នាព្រឹកថ្ងៃទី៩ ខែកុម្ភះ ឆ្នាំ២០២២នេះ។

លោកជំទាវបណ្ឌិតសភាចារ្យរដ្ឋមន្រ្តី បានបន្តទៀតថា ក្រៅពីការស្នើចុះបញ្ជីខាងលើ​យើង ក៏​មាន​បណ្តាញ ទីក្រុងដែលមានភាពច្នៃប្រឌិត (Creative Cities Network) របស់អង្គការយូណេស្កូ ហើយក៏បានបន្តរៀបចំបញ្ជីត្រៀម ដើម្បីគ្រោងស្នើសុំចុះសម្បត្តិវប្បធម៌​ដែល​មាន​សក្ដានុពល​ផ្សេងទៀត ​ទៅក្នុងបញ្ជីបេតិកភណ្ឌ ​របស់​អង្គការយូណេស្កូ រួមមាន ក្រុមប្រាសាទបន្ទាយឆ្មារ, រមណីយដ្ឋានអង្គរបុរី និងភ្នំដា, រមណីយដ្ឋានគូលែន, ក្រុមប្រាសាទបេងមាលា, ក្រុមប្រាសាទព្រះខ័នកំពង់ស្វាយ, រមណីយដ្ឋានឧដុង្គ, “សារមន្ទីរឧក្រិដ្ឋកម្មប្រល័យពូជសាសន៍ទួលស្លែង, មជ្ឈមណ្ឌល ប្រល័យពូជ សាសន៍ជើងឯក, អតីតមន្ទីរឃុំឃាំង ម-១៣”, និងព្រះរាជពិធីបុណ្យអុំទូក។

លោកជំទាវ បណ្ឌិតសភាចារ្យ ភឿង សកុណា បានបញ្ជាក់ទៀតថា ក្រសួងបាន យកចិត្តទុកដាក់​និង​សហការជាមួយសហគមន៍ ​ក្នុងការបណ្តុះបណ្តាល​ និងរៀបចំការសម្តែង សិល្បៈដោយ​ក្នុង​នោះក្រសួង​បានស្តារល្ខោនវត្តកៀនស្វាយក្រៅ ឱ្យរស់រានឡើងវិញ​ ព្រមទាំង បានពង្រឹងការ​ថែ​រក្សា​សិល្បៈវប្បធម៌របស់សហគមន៍សំខាន់ៗនៅខេត្តចំនួន១១​ រួមទាំង​សហគមន៍​របស់ជនជាតិ​ដើម​ភាគតិច​នៅខេត្តចំនួន៨។

ក្រសួងបានឆ្លាក់ចម្លងស្បែកធំឈុតថ្មី បានចំនួន៩០ ផ្ទាំង ​និងបានសិក្សាស្រាវជ្រាវចងក្រងឯកសារ របាំក្បាច់បុរាណ ឬរបាំព្រះរាជទ្រព្យ, ក្រាំងចម្រៀង សម្រាប់ច្រៀងអមកំដរក្នុងរបាំព្រះរាជទ្រព្យ , ក្បាច់ហួន ល្ខោនបាសាក់, និងល្ខោនបាមោជ្ជទ័យ ព្រមទាំងបានបោះពុម្ពសៀវភៅ “នារីរបាំកម្ពុជា​សម័យចតុមុខ និងសម័យអង្គរ” ជាភាសាខ្មែរ។

ទន្ទឹមគ្នានេះ ក្រសួងក៏បានបង្កើនការផ្សព្វផ្សាយសិល្បៈទស្សនីយភាពខ្មែរ ពិសេសស្នាដៃសិល្បៈ ដែល​ទើបដំឡើងថ្មី​ដល់សាធារណជន ​តាមរយៈបណ្ដាញ​សង្គមហ្វេសប៊ុកផ្លូវការ របស់​ក្រសួងផងដែរ។

ជាពិសេសគិតមកដល់ថ្ងៃនេះ ​យើងបានបំពេញការងារអស់រយៈពេលជាងពាក់កណ្ដាលអាណត្តិ​រួច​ទៅ​ហើយ ​នៅក្នុងរយៈពេល៥ឆ្នាំ ​នៃអាណត្តិរបស់រាជរដ្ឋាភិបាលកម្ពុជានីតិកាលទី៦​ នៃរដ្ឋសភា​ក្រោម​ការ​ដឹកនាំ​ប្រកប​ដោយ​គតិបណ្ឌិត ​និងចក្ខុវិស័យ​វែងឆ្ងាយរបស់​សម្ដេច​អគ្គ​មហា​សេនាបតីតេជោ ​ហ៊ុន សែន នាយករដ្ឋមន្ត្រី ​នៃព្រះរាជាណាចក្រកម្ពុជា។

ក្នុងរយៈពេលជាង​ពាក់កណ្ដាលអាណត្តិនេះ ​ក្រសួងវប្បធម៌​ និងវិចិត្រ​សិល្បៈបានបន្តខិតខំ​ប្រឹង​ប្រែង​អនុវត្ត ​និង​សហការអនុវ​ត្ត​ការងារ​គ្រប់មុខ​ព្រួញ​ទាំងអស់ ​នៃយុទ្ធសាស្ត្រ​ ទាំងការងារក្នុង​វិស័យ​វប្បធម៌ ការងារ​ក្រៅ​វិស័យវប្បធម៌ ​និង​ការងារ​អន្តរ​វិស័យ​ ដោយអនុលោមទៅតាម​កម្មវិធី​នយោ​បាយ​របស់រាជ​រដ្ឋាភិបាល​កម្ពុជា ​ជាពិសេសយុទ្ធសាស្រ្តចតុ​កោណដំណាក់កាលទី៤ និង​ផែនការ​យុទ្ធសាស្រ្តអភិវឌ្ឍន៍​ជាតិ២០១៩-២០២៣៕ អត្ថបទ រដ្ឋា