សហរដ្ឋអាមេរិក បានចុះហត្ថលេខាលើកិច្ចព្រមព្រៀងពាណិជ្ជកម្ម និងរ៉ែសំខាន់ៗជាច្រើន ជាមួយដៃគូអាស៊ីអាគ្នេយ៍ចំនួន៤ ដូចជា ម៉ាឡេស៊ី កម្ពុជា ថៃ និងវៀតណាម កាលពីថ្ងៃអាទិត្យ (២៦ តុលា) កន្លងទៅ ដោយស្វះស្វែងរកដំណោះស្រាយលើអតុល្យភាពពាណិជ្ជកម្ម និងធ្វើពិពិធកម្មខ្សែច្រវាក់ផ្គត់ផ្គង់ ស្របពេលមានការរឹតបន្តឹងការនាំចេញរ៉ែកម្រពីប្រទេសចិន។

ប្រធានាធិបតីអាមេរិក លោក Donald Trump -- ដែលបានទៅទីក្រុងគូឡាឡាំពួរ ដើម្បីចូលរួមកិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍ (អាស៊ាន) -- បានចុះកិច្ចព្រមព្រៀងពាណិជ្ជកម្ម "បដិការ" ជាមួយសមភាគីម៉ាឡេស៊ី និងកម្ពុជា ក៏ដូចជាកិច្ចព្រមព្រៀងក្របខណ្ឌពាណិជ្ជកម្មជាមួយថៃ ដែលនឹងមើលឃើញប្រទេសទាំងបីធ្វើការដើម្បីដោះស្រាយរបាំងពន្ធ និងមិនមែនពន្ធ។

យោងតាមសេចក្តីថ្លែងការណ៍រួមដែលចេញផ្សាយដោយសេតវិមានបានឱ្យដឹងថា សហរដ្ឋអាមេរិក នឹងនៅតែទុកអត្រាពន្ធ ១៩% លើការនាំចេញពីប្រទេសទាំងបីក្រោមកិច្ចព្រមព្រៀងថ្មីនេះ ខណៈពន្ធបែបនេះនឹងត្រូវបន្ថយមកត្រឹម ០% សម្រាប់ទំនិញមួយចំនួន (ពោលគឺផលិតផលឧស្សាហកម្ម និងកសិកម្មមួយចំនួន)។ ទីក្រុងវ៉ាស៊ីនតោនក៏បានប្រកាសផងដែរនូវកិច្ចព្រមព្រៀងក្របខណ្ឌស្រដៀងគ្នានេះជាមួយវៀតណាម ដែលកំពុងបង់ពន្ធ ២០% លើការនាំចេញរបស់ខ្លួនទៅកាន់សហរដ្ឋអាមេរិក។

នៅក្រោមកិច្ចព្រមព្រៀងនេះ ប្រទេសអាស៊ីអាគ្នេយ៍ទាំង៤ បានសន្យាថានឹងដកចេញរបាំងពាណិជ្ជកម្ម និងផ្តល់នូវការចូលទៅកាន់ទីផ្សារដោយអនុគ្រោះដល់ទំនិញផ្សេងៗរបស់សហរដ្ឋអាមេរិក។ លើសពីនេះទៅទៀត កិច្ចព្រមព្រៀងនេះក៏រួមបញ្ចូលទាំងការប្តេជ្ញាចិត្តក្នុងពាណិជ្ជកម្មឌីជីថល សេវាកម្ម និងការវិនិយោគ ព្រមទាំងការសន្យារបស់បណ្តាប្រទេសអាស៊ីអាគ្នេយ៍ទាំង៤ ក្នុងការការពារសិទ្ធិពលកម្ម និងពង្រឹងការការពារបរិស្ថាន៕