ប្រធានាធិបតីអាមេរិក លោក Donald Trump បានចាកចេញពីម៉ាឡេស៊ី ឆ្ពោះទៅកាន់ទីក្រុងតូក្យូ នៅថ្ងៃចន្ទ (២៧ តុលា) នេះ ជាទីដែលលោកគ្រោងនឹងចូលគាល់ព្រះចៅអធិរាជជប៉ុន និងជួបជាមួយនាយករដ្ឋមន្ត្រីទើបជាប់ឆ្នោតថ្មី លោកស្រី Sanae Takaichi ជាផ្នែកមួយនៃដំណើរទស្សនកិច្ចនៅអាស៊ីរបស់លោក ក្នុងគោលបំណងធានាកិច្ចព្រមព្រៀងពាណិជ្ជកម្ម វិនិយោគ និងបង្កើនការចំណាយវិស័យការពារជាតិ ខណៈកិច្ចប្រជុំដែលបានគ្រោងទុកជាមួយសមភាគីចិននៅកូរ៉េខាងត្បូង ក៏ជិតមកដល់។

លោក Trump កំពុងស្ថិតក្នុងដំណើរក្រៅប្រទេសដ៏វែងឆ្ងាយបំផុតចាប់តាំងពីចូលកាន់តំណែងជាថ្មីក្នុងខែមករាមក ហើយលោកបានប្រកាសពីកិច្ចព្រមព្រៀងមួយចំនួនជាមួយបណ្តាប្រទេសអាស៊ីអាគ្នេយ៍ជាច្រើន អំឡុងពេលកិច្ចប្រជុំអាស៊ាននៅម៉ាឡេស៊ី។ ដំណើររបស់លោកត្រូវរំពឹងថា នឹងបញ្ចប់ក្នុងកិច្ចប្រជុំកំពូលជាមួយលោកប្រធានាធិបតីចិន Xi Jinping នៅកូរ៉េខាងត្បូង នាថ្ងៃព្រហស្បតិ៍សប្ដាហ៍នេះ ខណៈក្រុមចរចារបស់ប្រទេសសេដ្ឋកិច្ចធំជាងគេទាំងពីរ ស្វះស្វែងបញ្ចៀសសង្គ្រាមពាណិជ្ជកម្ម។

ខណៈដែលលោក Trump បានទទួលការសន្យាវិនិយោគ ៥៥០ពាន់លានដុល្លាររួចមកហើយពីជប៉ុនជាថ្នូរនឹងកាបន្ទាបពន្ធនាំចូល — លោកស្រី Takaichi សង្ឃឹមថា នឹងធ្វើឱ្យលោក Trump កាន់តែចាប់អារម្មណ៍បន្ថែមទៀតជាមួយនឹងការសន្យាទិញរថយន្តភីកអាប់របស់សហរដ្ឋអាមេរិក សណ្តែកសៀង និងឧស្ម័ន។

ក្នុងជំនួបទូរសព្ទជាលើកដំបូងកាលពីថ្ងៃសៅរ៍កន្លងទៅ លោកស្រី Takaichi ដែលបានក្លាយជានាយករដ្ឋមន្ត្រីស្ត្រីដំបូងគេរបស់ជប៉ុនកាលពីសប្តាហ៍មុន បានប្រាប់លោក Trump ថា ការពង្រឹងសម្ព័ន្ធភាពរបស់ភាគីទាំងពីរ គឺជា "អាទិភាពចម្បង" របស់លោកស្រី៕