ជើងហោះហើរជាង ៨ពាន់ជើង ត្រូវបានពន្យារពេលទូទាំងសហរដ្ឋអាមេរិក កាលពីថ្ងៃអាទិត្យ (២៦ តុលា) ខណៈអវត្តមានរបស់បុគ្គលិកបញ្ជាចរាចរណ៍ផ្លូវអាកាស បានបន្តរំខានដល់ការធ្វើដំណើរនៅទូទាំងប្រទេស ហើយការបិទរដ្ឋាភិបាលសហព័ន្ធ បានឈានដល់ថ្ងៃទី២៦ របស់ខ្លួនហើយ ចាប់ពីថ្ងៃបិទដំបូងទី១ ខែតុលា មក (គិតតាមពេលវេលានៅសហរដ្ឋអាមេរិក)។

រដ្ឋមន្ត្រីដឹកជញ្ជូនរបស់សហរដ្ឋអាមេរិក លោក ស្ហន ឌូហ្វី (Sean Duffy) បាននិយាយថា រដ្ឋបាលអាកាសចរណ៍សហព័ន្ធបានជួបប្រទះបញ្ហាបុគ្គលិកគ្រប់គ្រងចរាចរណ៍ផ្លូវអាកាសនៅ ២២ទីតាំងកាលពីថ្ងៃសៅរ៍កន្លងទៅ ហើយការខ្វះខាតបន្ថែមទៀតត្រូវបានរំពឹងថា នឹងនាំឱ្យមានការពន្យារពេលជើងហោះហើរ និងការលុបចោលកាន់តែច្រើននៅប៉ុន្មានថ្ងៃខាងមុខ។

យោងតាមគេហទំព័រតាមដានការហោះហើរ FlightAware បង្ហាញថា មានការពន្យារពេលជើងហោះហើររបស់សហរដ្ឋអាមេរិកជាង ៨.០០០ជើង នៅម៉ោងក្នុងស្រុក ១១យប់ ថ្ងៃអាទិត្យ កើនឡើងពីតួលេខប្រហែល ៥.៣០០ជើង កាលពីថ្ងៃសៅរ៍។ ចលាចលផ្លូវអាកាសបែបនេះកាន់តែអាក្រក់ទៅ ចាប់តាំងពីរដ្ឋាភិបាលអាមេរិក បានចាប់ផ្តើមបិទអស់ជិត ១ខែមកនេះ។

បុគ្គលិកត្រួតពិនិត្យចរាចរណ៍ផ្លូវអាកាសប្រហែល ១៣.០០០នាក់ និងមន្ត្រីរដ្ឋបាលសន្តិសុខដឹកជញ្ជូនប្រហែល ៥០.០០០នាក់ ត្រូវបង្ខំចិត្តបន្តធ្វើការ ទោះជាពួកគេមិនបានប្រាក់ឈ្នួល កំឡុងពេលភាពជាប់គាំងនេះក៏ដោយ។ រដ្ឋបាលអាមេរិកព្រមានថា ការរំខានជើងហោះហើរនឹងកើនឡើងកាន់តែវឹកវរ នៅពេលបុគ្គលិកខកខានប្រាក់ខែពេញលេញជាលើកដំបូងរបស់ពួកគេ នៅថ្ងៃអង្គារសប្ដាហ៍នេះ៕