ប្រេងបានឡើងថ្លៃបន្តិចក្នុងការជួញដូរដំបូងនាថ្ងៃចន្ទ (២៧ តុលា) នេះ បន្ទាប់ពីក្រុមមន្ត្រីសេដ្ឋកិច្ចអាមេរិក និងចិន បានគូសបញ្ជាក់ពីក្របខណ្ឌកិច្ចព្រមព្រៀងពាណិជ្ជកម្ម ដោយបន្ធូរបន្ថយភាពភ័យខ្លាចថា ពន្ធគយ និងការទប់ស្កាត់ការនាំចេញរវាងអ្នកប្រើប្រាស់ប្រេងធំជាងគេទាំងពីររបស់ពិភពលោកនេះ អាចប៉ះពាល់ដល់កំណើនសេដ្ឋកិច្ចសកល។

សន្ទស្សន៍ប្រេងឆៅរបស់ Brent បានកើនឡើង ៤៦សេន ឬ ០,៧% ដល់តម្លៃ ៦៦,៤០ដុល្លារក្នុងមួយបារ៉ែល គិតត្រឹមម៉ោងសកល ០០:២៧នាទី រំលងអាធ្រាត្រឈានចូលថ្ងៃចន្ទនេះ ហើយភាគហ៊ុនប្រេងឆៅរបស់អាមេរិក WTI បានកើនឡើង ៤៦សេន ដូចគ្នាឬ ០,៧៥% ដល់តម្លៃ ៦១,៩៦ដុល្លារ បន្ទាប់ពីកំណើនដ៏ធំកាលពីសប្តាហ៍មុន ៨,៩% និង ៧,៧% រៀងគ្នា ដោយសារការដាក់ទណ្ឌកម្មរបស់សហរដ្ឋអាមេរិក និងប្លុកអឺរ៉ុប លើរុស្ស៊ី។

ក្រុមហ៊ុនសន្តិសុខហិរញ្ញវត្ថុ ហៃថុង (Haitong) បាននិយាយក្នុងកំណត់ត្រាមួយថា ក្ដីរំពឹងរបស់ទីផ្សារមានភាពប្រសើរឡើង បន្ទាប់ពីទណ្ឌកម្មថ្មីលើរុស្ស៊ី និងភាពតានតឹងធូរស្រាលរវាងអាមេរិក-ចិន ដែលលុបបំបាត់ក្ដីបារម្ភនៃការផ្គត់ផ្គង់ប្រេងឆៅលើសកម្រិត ដែលបានទម្លាក់តម្លៃប្រេងកាលពីដើមខែតុលា។

ទាក់ទងនឹងពាណិជ្ជកម្ម រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយកាលពីថ្ងៃអាទិត្យថា មន្ត្រីសេដ្ឋកិច្ចជាន់ខ្ពស់របស់ចិន និងអាមេរិក សម្រេចបាននូវ "ក្របខណ្ឌដ៏សំខាន់" សម្រាប់កិច្ចព្រមព្រៀងពាណិជ្ជកម្មនៅទីក្រុងគូឡាឡាំពួ ដែលនឹងអនុញ្ញាតឱ្យលោកប្រធានាធិបតីអាមេរិក Donald Trump និងសមភាគីចិន លោក Xi Jinping ពិភាក្សាបន្ត អំពីកិច្ចសហប្រតិបត្តិការពាណិជ្ជកម្មក្នុងជំនួបដោយផ្ទាល់នៅសប្តាហ៍នេះ៕