ភ្នំពេញ៖ ក្រសួងសុខាភិបាល នៅថ្ងៃទី០៨ ខែកុម្ភៈ បានស្នើដល់អាជ្ញាធររាជធានី-ខេត្ត កៀរគរ​ប្រជាពលរដ្ឋទៅទទួលការចាក់វ៉ាក់សាំងដូសទី៣ ឬដូសជំរុញឱ្យបានលឿន រួមជាមួយ នឹងការធ្វើយុទ្ធនាការអប់រំផ្សាយតាមគ្រប់រូបភាព ដើម្បីទប់ស្កាត់ការរីករាលដាលជំងឺកូវីដ១៩ បំប្លែងថ្មីអូមីក្រុង។

សេចក្តីណែនាំក្រើនរំលឹករបស់ក្រសួងសុខាភិបាលស្តីពីបន្តការការពារការចម្លងវីរុសកូវីដ១៩ ជា​ពិសេសអូមីក្រុង បានឱ្យដឹងថា ដោយសង្កេតឃើញថា បច្ចុប្បន្ននេះ ស្ថានភាពនៃការឆ្លងវីរុស​កូវីដ១៩ ពោលគឺអូមីក្រុងនៅកម្ពុជា មានការកើនឡើងជាបន្តបន្ទាប់លើសពី៣ខ្ទង់​ទៅ​ហើយជារៀងរាល់ថ្ងៃ​ ដែលគួរឱ្យមានការព្រួយបារម្ភ ​តែវិធានការការពារការចម្លងជំងឺកូវីដ១៩ នៅមិនទាន់មានការអនុវត្តន៍បាន​ម៉ត់ចត់ ​និង​ម៉ឺងម៉ាត់​ ជាពិសេសការជួបជុំគ្នា គឺមានការកើន​ឡើងច្រើនទៅៗ ​ដោយមិនមានការប្រតិបត្តិត្រឹមត្រូវតាមវិធានការសុខាភិបាល ដែល​បង្កលទ្ធភាព​ឱ្យ​មានការចម្លងវីរុសកូវីដ១៩ ​កាន់ច្រើនឡើងជារៀងរាល់ថ្ងៃ។

សេចក្តីណែនាំដដែល ​បានបញ្ជាក់ថា រាជរដ្ឋាភិបាលបានធ្វើយុទ្ធនាការចាក់ថ្នាំបង្ការជំងឺកូវីដ១៩​នៅ​ទូទាំង​ប្រទេស​ប្រកប​ដោយជោគជ័យ ​សម្រាប់ការចាក់ដូសមូលដ្ឋាន ក៏ប៉ុន្តែជាការចាំបាច់បំផុត​នៅ​ក្នុងកាលៈទេសៈនេះ ​ដែលបងប្អូនត្រូវមកទទួលយកនូវការចាក់ដូសទី៣​ ឬដូសជំរុញបន្ថែមទៀត ដែល​ក្រសួងសុខាភិបាល ​ស្នើសុំឱ្យរដ្ឋបាលរាជធានី-ខេត្ត ​ទាំង២៥ ​និង​អាជ្ញាមូលដ្ឋាននៅតាមស្រុក សង្កាត់-ឃុំ ​ភូមិនៅទូទាំងប្រទេស ​ចាត់ចែងកៀរគរប្រជាជនដែល​មិនទាន់បានចាក់ដូសទី៣ ឬដូស​ជំរុញ ​នៅតាមមូលដ្ឋានរបស់ខ្លួន ​សហការជាមួយមន្ទីរសុខាភិបាល ក្នុងដែនសមត្ថកិច្ច​របស់ខ្លួន ជំរុញ​ការងារចាក់វ៉ាក់សាំងកូវីដ១៩ ឱ្យបានលឿន រួមជាមួយនឹងការធ្វើយុទ្ធនាការអប់រំផ្សាយ​តាមគ្រប់រូបភាពស្តីពីការបន្តការការពារការចម្លងវីរុសកូវីដ១៩អូមីក្រងនេះឱ្យបានទូលំទូលាយ ដល់ប្រជាជន​នៅ​តាម​សហគមន៍​ឱ្យបានជាប់ជាប្រចាំជាមួយការដាក់ចេញ​នូវ​យន្តការ​តាមដាន​ការ​អនុវត្តវិធានការការពារទាំងនេះផងដែរ។

បើតាមក្រសួងសុខាភិបាល ជំងឺកូវីដ១៩បំប្លែងថ្មីអូមីក្រុង (Omicron) កំពុងតែចរាចរយ៉ាងឆាប់រហ័ស​ដោយ​គ្មានព្រំដែន​ និងគ្មានលិខិតឆ្លងដែន​ នៅលើសកលលោក ​ទាំងក្នុងតំបន់ ​និងនៅកម្ពុជា ដែល​តម្រូវឱ្យបងប្អូនចាំបាច់ត្រូវតែប្រុងប្រយ័ត្ន និងត្រៀមលក្ខណៈឱ្យបានគ្រប់គ្រាន់ក្នុងការឆ្លើយ​តបទៅ​នឹងជំងឺកូវីដ១៩នេះ ​ឱ្យបានទាន់ពេលវេលាដើម្បី​ជៀសវាង​បាន​នូវមហន្តរាយសុខភាព​សាធារណៈ ផល​ប៉ះពាល់សេដ្ឋកិច្ចគ្រួសារ ​និងសេដ្ឋកិច្ចសង្គម រួមទាំង​ការ​ចៀសវាង​បាននូវការវិលត្រឡប់​ទៅ​រកផលលំបាកនៃការរស់នៅប្រចាំថ្ងៃរបស់បងប្អូន ​សំដៅធានាបាននូវ​និរន្តរភាព​នៃ​ការរស់​នៅ​ធម្មតា ក្នុង​ប្រក្រតីភាពថ្មីរបស់​បងប្អូនឲ្យបានយូរអង្វែង​នោះ​ សូមប្រជាពលរដ្ឋទាំង​អស់​បន្តអនុវត្តន៍​ឱ្យបាន​ខ្ជាប់ខ្ជួន​នូវវិធានការសុខាភិបាល ​ជាពិសេស៣ការពារ ៣កុំ ​និង​ការអញ្ជើញ​ទៅចាក់វ៉ាក់សាំង​កូវីដ​១៩ ដូសទី៣ ឬសជំរុញ ឱ្យបានគ្រប់ៗគ្នា៕អត្ថបទ៖ សេក ឧត្តម