ក្រុមហាម៉ាស បាននិយាយកាលពីថ្ងៃអាទិត្យ (២៦ តុលា) ថា ខ្លួនបានពង្រីកប្រតិបត្តិការស្វែងរកសាកសពចំណាប់ថ្នូរនៅទូទាំងតំបន់ហ្កាហ្សាស្ទ្រីប រយៈពេលមួយថ្ងៃបន្ទាប់ពីអេហ្ស៊ីប បានបញ្ជូនក្រុមជំនាញ និងឧបករណ៍ធុនធ្ងន់ដើម្បីជួយស្វែងរកសាកសពមកវិញ ហើយកិច្ចប្រឹងប្រែងនេះកើតឡើងបន្ទាប់ពីការព្រមានខ្លាំងៗជាថ្មីម្ដងទៀតរបស់លោកប្រធានាធិបតីអាមេរិក Donald Trump។

ក្រោមបទឈប់បាញ់សម្របសម្រួលដោយសហរដ្ឋអាមេរិក ដែលបានចូលជាធរមាននៅថ្ងៃទី១០ ខែតុលា ក្រុមហាម៉ាសត្រូវរំពឹងថានឹងប្រគល់សពរបស់ចំណាប់ថ្នូរអ៊ីស្រាអែលទាំងអស់ ឱ្យបានឆាប់តាមដែលអាចធ្វើទៅបាន។ អ៊ីស្រាអែល បានយល់ព្រមប្រគល់សាកសពជនជាតិប៉ាឡេស្ទីនចំនួន ១៥នាក់ ដោះដូរសពចំណាប់ថ្នូរម្នាក់។

មកទល់ពេលនេះ ក្រុមហាម៉ាស បានប្រគល់សពចំណាប់ថ្នូរ ១៥នាក់ ឱ្យអ៊ីស្រាអែលវិញហើយ ប៉ុន្តែក្នុងរយៈពេល ៥ថ្ងៃកន្លងទៅនោះ មិនទាន់បានប្រគល់ឱ្យទៀតទេ។ ភាគីអ៊ីស្រាអែល បានប្រគល់សពជនជាតិប៉ាឡេស្ទីន ១៩៥នាក់ទៅវិញ ដែលភាគច្រើនមិនស្គាល់អត្តសញ្ញាណ។

ប្រធានក្រុមហាម៉ាសនៅតំបន់ហ្កាហ្សា លោក Khalil al-Hayya បាននិយាយកាលពីថ្ងៃអាទិត្យថា “ក្រុមនេះបានចាប់ផ្តើមស្វែងរកសាកសពចំណាប់ថ្នូរ ១៣នាក់នៅសេសសល់ ក្នុងតំបន់ថ្មីៗដែលមិនទាន់បានទៅដល់”។ ក្រុមហាម៉ាស បាននិយាយម្តងហើយម្តងទៀតថា កិច្ចប្រឹងប្រែងរកសាកសពបែបនេះ ជួបបញ្ហាប្រឈមច្រើនណាស់ ដោយសារតែការបំផ្លិចបំផ្លាញដ៏ធំ។

ទាក់ទងនឹងរឿងនេះ ប្រធានាធិបតីអាមេរិក លោក Donald Trump បានព្រមានកាលពីថ្ងៃសៅរ៍ចុងសប្ដាហ៍កន្លងទៅថា លោកកំពុងតែ "ឃ្លាំមើលយ៉ាងជិតស្និទ្ធបំផុត" ដើម្បីធានាថាក្រុមហាម៉ាស ប្រគល់សពឱ្យបន្ថែមទៀតក្នុងរយៈពេល ៤៨ម៉ោងបន្ទាប់៕