មជ្ឈមណ្ឌលគ្រប់គ្រងវិបត្តិជាតិបាននិយាយថា សមាជិកណាតូគឺប្រទេសលីទុយអានី បានបិទអាកាសយានដ្ឋានរដ្ឋធានី វីលនីញូស (Vilnius) និងច្រកព្រំដែនជាមួយប្រទេសបេឡារុស កាលពីថ្ងៃអាទិត្យ (២៦ តុលា) បន្ទាប់ពីវត្ថុអាកាសជាច្រើនដែលត្រូវគេកំណត់ថាជាបាឡុងឧស្ម័នអេលីយ៉ូម បានហោះចូលទៅក្នុងដែនអាកាសរបស់ខ្លួន ដែលជាឧបទ្ទវហេតុលើកទី៤ ហើយនៅក្នុងសប្តាហ៍កន្លងទៅនោះ។

លីទុយអានី បាននិយាយថា បាឡុងនោះត្រូវបញ្ជូនដោយអ្នករត់ពន្ធបារីខុសច្បាប់ ប៉ុន្តែខ្លួនក៏បានបន្ទោសលើលោកប្រធានាធិបតីបេឡារុស Alexander Lukashenko ដែលជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ីផងដែរ ចំពោះការមិនបញ្ឈប់ការរត់ពន្ធបែបនេះ។

ក្រុមមន្ត្រីបាននិយាយថា ចរាចរណ៍នៅអាកាសយានដ្ឋានរដ្ឋធានីនេះ ត្រូវបានផ្អាករហូតដល់ម៉ោងសកល ២៣:៤០នាទី ខណៈដែលព្រំដែនជាមួយបេឡារុស នឹងនៅតែបន្តបិទដោយរង់ចាំកិច្ចប្រជុំរបស់គណៈកម្មការសន្តិសុខជាតិរបស់ប្រទេសលីទុយអានី នៅថ្ងៃចន្ទ ទី២៧ ខែតុលា នេះ។

ឧបទ្ទវហេតុដែនអាកាសបែបនេះគឺជាលើកទីបួនហើយ ដោយអាជ្ញាធរបាននិយាយថា អាកាសយានដ្ឋាន Vilnius ក៏ត្រូវបិទនៅថ្ងៃអង្គារ សុក្រ និងថ្ងៃសៅរ៍នៃសប្តាហ៍កន្លងទៅផងដែរ ក៏ដូចជានៅថ្ងៃទី៥ ខែតុលា ដែលរាល់ពេលបិទគឺដោយសារមានបាឡុងហោះចូលក្នុងដែនអាកាសរបស់រដ្ឋធានីលីទុយអានីមួយនេះ៕