នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយបញ្ជាក់ច្បាស់ៗកាលពីថ្ងៃអាទិត្យ (២៦ តុលា) ថា អ៊ីស្រាអែល នឹងមិនស្នើសុំការអនុញ្ញាតដើម្បីបើកការវាយប្រហារនៅតំបន់ហ្កាហ្សា ឬប្រទេសលីបង់នោះទេ សូម្បីតែបន្ទាប់ពីយល់ព្រមលើបទឈប់បាញ់ក៏ដោយ។

លោក Netanyahu បានប្រាប់ក្រុមរដ្ឋមន្ត្រីពេលបើកកិច្ចប្រជុំរដ្ឋាភិបាលប្រចាំសប្តាហ៍ថា "អ៊ីស្រាអែល គឺជារដ្ឋឯករាជ្យមួយ ហើយអ៊ីស្រាអែលនឹងការពារខ្លួនជាមួយនឹងកងកម្លាំងផ្ទាល់របស់ខ្លួន ហើយនឹងបន្តគ្រប់គ្រងជោគវាសនាដោយខ្លួនឯង"។ លោកបន្ថែមថា "អ៊ីស្រាអែលមិនចាំបាច់ស្វះស្វែងរកការយល់ព្រមពីនរណាម្នាក់ឡើយសម្រាប់រឿងនេះ"។

សុន្ទរកថារបស់លោកបានធ្វើឡើងបន្ទាប់ពីទីភ្នាក់ងារព័ត៌មានរដ្ឋរបស់អ៊ីស្រាអែល បានរាយការណ៍ថា មនុស្សជាច្រើននាក់ ស្លាប់និងរបួស ក្នុងការវាយប្រហារតាមអាកាសដាច់ដោយឡែកពីគ្នារបស់អ៊ីស្រាអែល នៅភាគខាងត្បូងលីបង់ កាលពីថ្ងៃអាទិត្យ។ កាលពីថ្ងៃសៅរ៍ យោធាអ៊ីស្រាអែលនិយាយថា កងកម្លាំងអ៊ីស្រាអែលបាន "វាយប្រហារកំណត់គោលដៅ" លើបុគ្គលម្នាក់នៅភាគកណ្តាលតំបន់ហ្កាហ្សា ដែលគ្រោងនឹងវាយប្រហារលើកងទ័ពអ៊ីស្រាអែល។

គួរបញ្ជាក់ថា បទឈប់បាញ់រវាងអ៊ីស្រាអែល និងក្រុមសកម្មប្រយុទ្ធហេសបូឡា នៅលីបង់ បានចាប់ផ្តើមតាំងពីខែវិច្ឆិកា ឆ្នាំ២០២៤មក ហើយបទឈប់បាញ់ហ្កាហ្សា រវាងអ៊ីស្រាអែល-ក្រុមហាម៉ាស បានចូលជាធរមាននៅថ្ងៃទី១០ ខែតុលា ឆ្នាំ២០២៥នេះ៕