នាយករដ្ឋមន្ត្រីអូស្ត្រាលី លោក Anthony Albanese បាននិយាយនៅថ្ងៃចន្ទ (២៧ តុលា) នេះថា កិច្ចប្រជុំរបស់មេដឹកនាំនៃសម្ព័ន្ធសន្តិសុខចតុភាគីប្រទេស ឬហៅថា ក្វាដ (Quad) ទំនងជានឹងធ្វើឡើងនៅក្នុងត្រីមាសទីមួយនៃឆ្នាំ២០២៦ ខាងមុខ។

គួរឱ្យដឹងថា កិច្ចប្រជុំរបស់មេដឹកនាំក្វាដ រួមមានអូស្ត្រាលី សហរដ្ឋអាមេរិក ជប៉ុន និងឥណ្ឌា ធ្លាប់ត្រូវគេរំពឹងថា នឹងធ្វើជាម្ចាស់ផ្ទះដោយទីក្រុងញូវដែលី នៅឆ្នាំ២០២៥នេះ។ កិច្ចប្រជុំរបស់មេដឹកនាំបែបនេះ វិលជុំក្នុងចំណោមប្រទេសទាំងបួន។

យ៉ាងណាមិញ ថ្លែងខាងក្រៅកិច្ចប្រជុំកំពូលអាស៊ាន លោក Albanese បាននិយាយថា កិច្ចប្រជុំមួយទំនងជាធ្វើឡើងក្នុងត្រីមាសដំបូង ដែលសង្ឃឹមថានៅឆ្នាំក្រោយនេះ ដោយសារប្រធានាធិបតីអាមេរិក លោក Donald Trump "មមាញឹកខ្លាំងពេក" ក្នុងឆ្នាំ២០២៥នេះ រួមទាំងការចូលរួមក្នុងកិច្ចប្រជុំកំពូល APEC នៅកូរ៉េខាងត្បូង នៅចុងសប្តាហ៍នេះ។

មេដឹកនាំអូស្ត្រាលីរូបនេះ បានជួបជាមួយនាយករដ្ឋមន្ត្រីចិន លោក Li Qiang នៅក្រៅជំនួបអាស៊ាន នៅថ្ងៃចន្ទនេះផងដែរ។ លោក Albanese បាននិយាយថា នេះជាកិច្ចប្រជុំលើកទី៧ ហើយរបស់លោកជាមួយលោក Li ដែលបានបង្ហាញថា អូស្ត្រាលី និងចិន ជាដៃគូពាណិជ្ជកម្មដ៏ធំបំផុតរវាងគ្នា ហើយក៏អាចគ្រប់គ្រងការខ្វែងគំនិតគ្នាតាមរយៈកិច្ចសន្ទនា ខណៈទំនាក់ទំនងនៃភាគីទាំងពីរមានភាពប្រសើរឡើង និងមានស្ថិរភាព៕