ទីប្រឹក្សាសន្តិសុខប្រធានាធិបតីកូរ៉េខាងត្បូង នៅថ្ងៃចន្ទ (ទី២៧ ខែតុលា) នេះ បានប្រាប់ឲ្យដឹងថា លោកស្រី មិនជឿថា ជំនួប រវាងប្រធានាធិបតីអាមេរិក លោក Donald Trump និងមេដឹកនាំកូរ៉េខាងជើង លោក Kim Jong Un ទំនងជានឹងកើតឡើងក្នុងពេលឆាប់ៗនេះ។

លោកស្រី Oh Hyun-joo អនុប្រធានផ្នែកសន្តិសុខជាតិ សម្រាប់ការិយាល័យប្រធានាធិបតីកូរ៉េខាងត្បូង បានប្រាប់អ្នកសារព័ត៌មានថា លោកស្រីមិនមានព័ត៌មានច្បាស់លាស់នោះទេ ទោះបីជាមានការរំពឹងទុកនៅក្នុងប្រព័ន្ធផ្សព្វផ្សាយនានា ពាក់ព័ន្ធនឹងជំនួប រវាងមេដឹកនាំទាំង២ នៅពេលលោក Trump ធ្វើទស្សនកិច្ចនៅតំបន់អាស៊ីក៏ដោយ។

នៅប៉ុន្មានថ្ងៃមុននេះ លោក Trump បាននិយាយថា លោកបើកចំហរក្នុងការជួបជាមួយលោក Kim។ ហើយក្នុងអំឡុងដំណើរទស្សនកិច្ចរបស់លោកទៅកាន់កូរ៉េខាងត្បូង នាសប្តាហ៍នេះ លោក Trump គ្រោងនឹងមានកិច្ចប្រជុំកំពូលជាមួយប្រធានាធិបតីកូរ៉េខាងត្បូង លោក Lee Jae-myung នៅខាងក្រៅព្រឹត្តិការណ៍សហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC)។

សម្រាប់ទីក្រុងវ៉ាស៊ីនតោន និងសេអ៊ូល សម្ព័ន្ធមិត្តទាំង២ កំពុងស្វែងរកការបញ្ចប់កិច្ចព្រមព្រៀងពាណិជ្ជកម្មបឋមដែលបានឈានដល់ជាមួយលោក Trump កាលខែកក្កដា បន្ទាប់ពីជំនួបកំពូលលើកដំបូងរបស់មេដឹកនាំទាំង២ ក្នុងខែសីហា បានបញ្ចប់ទៅដោយគ្មានកិច្ចព្រមព្រៀងអ្វីឡើយ។

តែយ៉ាងណាក្ដី ទីប្រឹក្សារបស់ប្រធានាធិបតី លោកស្រី Oh បានឲ្យដឹងបន្ថែមថា លោកស្រីបានយល់ថា កិច្ចព្រមព្រៀងពាណិជ្ជកម្មចុងក្រោយណាមួយ ទំនងងជាមិនត្រូវបានឈានដល់នោះឡើយ ក្នុងអំឡុងពេលកិច្ចប្រជុំកំពូល Lee-Trump ក្នុងសប្តាហ៍នេះ៕