រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent កាលពីថ្ងៃអាទិត្យ (ទី២៦ ខែតុលា) បានប្រាប់ឲ្យដឹងថា ទីក្រុងវ៉ាស៊ីនតោន និងទីក្រុងប៉េកាំង បានប្រឹងប្រែងបញ្ចប់ឲ្យបានទាំងស្រុងនូវ «កិច្ចព្រមព្រៀងចុងក្រោយ» ក្នុងសប្ដាហ៍នេះ ជុំវិញការផ្ទេរទៅម្ចាស់ថ្មីនូវកម្មវិធីបណ្ដាញសង្គម TikTok នៅសហរដ្ឋអាមេរិក ដោយការលើកឡើងនេះកើតឡើងប៉ុន្មានថ្ងៃមុនពេលមានកិច្ចប្រជុំកំពូល រវាងប្រធានាធិបតីអាមេរិក និងចិន គឺលោក Donald Trump និងលោក Xi Jinping។

លោក Bessent បានប្រាប់កម្មវិធី Face the Nation របស់ប្រព័ន្ធផ្សព្វផ្សាយ CBS ថា៖ «ព័ត៌មានលម្អិតទាំងអស់ត្រូវបានបញ្ចប់ ហើយវានឹងមានសម្រាប់មេដឹកនាំទាំង២ ដើម្បីបញ្ចប់ប្រតិបត្តិការនោះទាំងស្រុង នៅថ្ងៃព្រហស្បតិ៍ ក្នុងប្រទេសកូរ៉េខាងត្បូង។ ការទទួលខុសត្រូវរបស់ខ្ញុំ គឺធ្វើឲ្យខាងភាគីចិនយល់ព្រមលើប្រតិបត្តិការនេះ ហើយខ្ញុំជឿថា យើងសម្រេចបានដោយជោគជ័យនូវភារកិច្ចនោះ ក្នុងរយៈពេល ២ថ្ងៃកន្លងមកនេះ»។

គួរបញ្ជាក់ថា ដោយលើកឡើងពីក្ដីបារម្ភផ្នែកសន្តិសុខជាតិ ទីក្រុងវ៉ាស៊ីនតោនបានព្យាយាមធ្វើឲ្យប្រតិបត្តិការរបស់ TikTok នៅសហរដ្ឋអាមេរិក កុំឲ្យស្ថិតក្រោមការគ្រប់គ្រងរបស់ក្រុមហ៊ុនមេ គឺ ByteDance របស់ចិន។ កាលពីខែមុន លោក Trump បានចុះហត្ថលេខាលើក្រឹត្យដែលនឹងនាំឲ្យការគ្រប់គ្រងស្ថិតក្រោមក្រុមអ្នកវិនិយោគអាមេរិក ដែលភាគច្រើនជាសម្ព័ន្ធមិត្តជិតស្និទ្ធរបស់លោកប្រធានាធិបតី។

ប្រសិនបើកិច្ចព្រមព្រៀងត្រូវបានបញ្ចប់សព្វគ្រប់ ក្រុមហ៊ុនអាមេរិក នឹងគ្រប់គ្រងជាង ៨០ភាគរយលើបណ្ដាញសង្គម TikTok។ គេរំពឹងថា ក្រុមហ៊ុនបច្ចេកវិទ្យាយក្ស Oracle និងក្រុមហ៊ុនវិនិយោគ Andreessen Horowitz និង Silver Lake Technology Management នឹងត្រូវបានបញ្ចូលទៅក្នុងបញ្ជីម្ចាស់ជាជនជាតិអាមេរិក៕