ប្រទេសចិន និងអូស្ត្រាលី នៅថ្ងៃចន្ទ (ទី២៧ ខែតុលា) បានព្យាយាមរក្សាទំនាក់ទំនងឲ្យនៅស្ថិរភាព ទោះបីជាមានភាពតានតឹង ជុំវិញការប៉ះទង្គិចយោធា នៅសមុទ្រចិនខាងត្បូង និងការប្រជែងគ្នា ក្នុងតំបន់អាស៊ី-ប៉ាស៊ីហ្វិកក៏ដោយ ដោយនាយករដ្ឋមន្ត្រីអូស្ត្រាលី លោក Anthony Albanese បានពណ៌នាភាគីទាំង២ ថា ជា «មិត្ត»។

បើយោងតាមទីភ្នាក់ងារសារព័ត៌មានចិន Xinhua បានឲ្យដឹងថា នៅខាងក្រៅកិច្ចប្រជុំកំពូលអាស៊ីអាគ្នេយ៍នៅប្រទេសម៉ាឡេស៊ី លោកនាយករដ្ឋមន្ត្រី Li Qiang បានប្រាប់នាយកលោករដ្ឋមន្ត្រី Albanese ថា ប្រទេសចិនបានត្រៀមរួចជាស្រេច ក្នុងការកសាងភាពជាដៃគូដែលមានស្ថិរភាព និងភាពជាដៃគូយុទ្ធសាស្ត្រ ជាមួយប្រទេសអូស្ត្រាលី។

កាលពីខែកក្កដា លោក Albanese បានទៅបំពេញទស្សនកិច្ច នៅប្រទេសចិន ដើម្បីជួសជុលទំនាក់ទំនងដែលជួបនឹងភាពអាប់អួជិតដល់ចំណុចបែកបាក់ ក្រោមរដ្ឋបាលមុនរបស់អូស្ត្រាលី ដោយលោកប្តេជ្ញាបន្តរក្សាបណ្តាញទំនាក់ទំនងឲ្យបើកចំហ និងស្វែងរកកិច្ចសហប្រតិបត្តិការលើផ្នែកនានា ខណៈពេលដែលការពារប្រឆាំងនឹង «ការយល់ច្រឡំ»។

សារព័ត៌មាន Xinhua បានបន្ថែមថា ក្នុងកិច្ចប្រជុំរបស់ពួកលោក នៅទីក្រុងគួឡាឡាំពួរនោះ លោក Li បានប្រាប់លោក Albanese ថា ទំនាក់ទំនងចិន-អូស្ត្រាលី នាពេលបច្ចុប្បន្ន កំពុងបង្ហាញពីនិន្នាការវិជ្ជមាន។

គួរបញ្ជាក់ថា កាលពីសប្តាហ៍មុន ភាគីទាំង២ បានបន្ទោសគ្នាទៅវិញទៅមក ជុំវិញការប៉ះទង្គិចគ្នា រវាងយោធារបស់ប្រទេសទាំង២ នៅសមុទ្រចិនខាងត្បូង ជាទីដែលតំបន់ភាគច្រើនត្រូវបានអះអាងសិទ្ធិដោយទីក្រុងប៉េកាំងថា ជាផ្នែកនៃទឹកដីរបស់ខ្លួន៕