ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី២៦ ខែតុលា) បានបញ្ជាក់ថា លោកនឹងដោះស្រាយវិបត្តិអាហ្វហ្គានីស្ថាន-ប៉ាគីស្ថាន «ឲ្យបានឆាប់រហ័ស» ខណៈដែលការចរចាសន្តិភាព រវាងប្រទេសជិតខាងដែលកំពុងមានសង្រ្គាមជាមួយគ្នា បានឈានចូលដល់ថ្ងៃទី២ ហើយ។

ប្រទេសទាំង២ កំពុងជាប់ផុងនៅក្នុងជម្លោះសន្តិសុខដ៏ជូរចត់ ដោយភាគីនីមួយៗ បានលើកឡើងថា ពួកគេកំពុងឆ្លើយតបទៅនឹងការឈ្លានពានពីភាគីម្ខាងទៀត ក្នុងអំឡុងពេលប៉ះទង្គិចគ្នា កាលពីដើមខែនេះ។

វាគឺជាការប្រយុទ្ធគ្នាបណ្ដាលឲ្យមានអ្នកស្លាប់ច្រើនបំផុត រវាងប្រទេសជិតខាងទាំង២ ក្នុងរយៈពេលជាច្រើនឆ្នាំមកនេះ ដោយបង្ហាញឲ្យឃើញនូវចំណុចទាបនៃទំនាក់ទំនង ខណៈពេលដែលក៏នាំឲ្យមានការព្រមានផងដែរនៅក្នុងតំបន់ ដែលក្រុមប្រដាប់អាវុធនានា ដូចជាអាល់កៃដាជាដើម កំពុងព្យាយាមបង្កចលាចលឡើងវិញ។

ប៉ាគីស្ថានចោទអាហ្វហ្គានីស្ថានថា បានធ្វើមិនដឹងមិនឮ ចំពោះពួកសកម្មប្រយុទ្ធដែលឆ្លងកាត់ព្រំដែន ដើម្បីធ្វើការវាយប្រហារ ជាការចោទប្រកាន់ដែលមេដឹកនាំតាលីបង់បដិសេធ។

កិច្ចចរចាជុំទី២ រវាងគូជម្លោះ បានចាប់ផ្តើមនៅក្នុងទីក្រុងអ៊ីស្តង់ប៊ុល ប្រទេសទួរគី កាលពីថ្ងៃសៅរ៍ ដោយផ្តោតលើការធ្វើឲ្យបទឈប់បាញ់ដ៏ផុយស្រួយដែលសម្រេចបានកាលពីដើមខែនេះ នៅទីក្រុងដូហា ប្រទេសកាតា ទៅជាក្របខ័ណ្ឌយូរអង្វែង សម្រាប់សន្តិភាព និងសន្តិសុខតាមព្រំដែន។

ពាក់ព័ន្ធនឹងជម្លោះនេះ នៅខាងក្រៅកិច្ចប្រជុំកំពូលអាស៊ាន ក្នុងប្រទេសម៉ាឡេស៊ី លោក Trump បានបញ្ជាក់ថា៖ «ខ្ញុំបានលឺថា ប៉ាគីស្ថាន និងអាហ្វហ្គានីស្ថាន បានចាប់ផ្តើមប្រយុទ្ធគ្នាឡើងវិញហើយ។ ប៉ុន្តែខ្ញុំនឹងដោះស្រាយជម្លោះនេះឲ្យបានឆាប់»។

កងទ័ពប៉ាគីស្ថាន បានឲ្យដឹងកាលពីថ្ងៃអាទិត្យថា ខ្លួនបានសម្លាប់ពួកសកម្មប្រយុទ្ធ ២៥នាក់ ខណៈពេលដែល «ទទួលបានជោគជ័យលើប៉ុនប៉ងជ្រៀតចូលវាយប្រហារដ៏ធំចំនួន២ នៅតាមបណ្តោយព្រំដែន ដោយវាបានកើតឡើងទាំងដែលគណៈប្រតិភូ កំពុងពិភាក្សានៅក្នុងទីក្រុងអ៊ីស្តង់ប៊ុល។ កងទ័ពក៏បានឲ្យដឹងទៀតដែរថា ទាហានប៉ាគីស្ថាន ៥នាក់ បានបាត់បង់ជីវិត ក្នុងអំឡុងពេលមានការបាញ់ប្រហារនេះ៕