ប្រធានាធិបតីអាមេរិក លោក Donald Trump បានបញ្ជាក់ថា ប្រធានាធិបតីរុស្ស៊ី លោក Vladimir Putin គួរតែបញ្ចប់សង្រ្គាម នៅអ៊ុយក្រែន ជាជាងសាកល្បងមីស៊ីលដើរដោយថាមពលនុយក្លេអ៊ែ ដោយបានបន្ថែមថា សហរដ្ឋអាមេរិកមាននាវាមុជទឹកនុយក្លេអ៊ែរនៅក្បែរឆ្នេរសមុទ្ររបស់រុស្ស៊ី។

គួរបញ្ជាក់ថា លោក Putin បាននិយាយកាលពីថ្ងៃអាទិត្យ (ទី២៦ ខែតុលា)ថា រុស្ស៊ីបានសាកល្បងដោយជោគជ័យនូវមីស៊ីលតម្រង់គោលដៅដើរដោយថាមពលនុយក្លេអ៊ែរ Burevestnik ជាអាវុធបំពាក់នុយក្លេអ៊ែរដែលទីក្រុងមូស្គូប្រាប់ថា អាចទម្លុះខែលការពារណាមួយ ហើយនឹងធ្វើការឆ្ពោះទៅរកការដាក់ពង្រាយនូវអាវុធនេះ។

ពេលត្រូវបានសួរនៅលើយន្តហោះ Air Force One អំពីការសាកល្បងមីស៊ីល 9M730 Burevestnik (Storm Petrel) ដែលត្រូវបានអង្គការណាតូ (NATO) ឲ្យឈ្មោះ SSC-X-9 Skyfall ដែលទីក្រុងមូស្គូបានបញ្ជាក់ថា បានហោះក្នុងចម្ងាយ ១៤.០០០គីឡូម៉ែត្រ លោក Trump បាននិយាយថា សហរដ្ឋអាមេរិកមិនចាំបាច់ប្រើអាវុធហោះឆ្ងាយចម្ងាយនោះទេ ព្រោះខ្លួនមាននាវាមុជទឹកនុយក្លេអ៊ែរ នៅម្ដុំសមុទ្ររុស្ស៊ី។

បើយោងតាមឯកសារសំឡេងដែលត្រូវបានបង្ហោះដោយសេតវិមាន បានឲ្យដឹងថា លោក Trump បានប្រាប់អ្នកសារព័ត៌មានថា៖ «ពួកគេដឹងថា យើងមាននាវាមុជទឹកនុយក្លេអ៊ែរ ដែលជានាវាមុជទឹកដ៏មានឥទ្ធិពលខ្លាំងក្លាបំផុត ក្នុងពិភពលោក ក្បែរៗម្ដុំសមុទ្ររបស់ពួកគេ ដូច្នេះខ្ញុំមានន័យថា វាមិនចាំបាច់មានអាវុធបាញ់ចម្ងាយ ៨.០០០ម៉ាយល៍ (១៤.០០០គីឡូម៉ែត្រ) នោះទេ»។

លោក Trump បានសង្កត់ធ្ងន់ថា៖ «ខ្ញុំមិនគិតថា វាជារឿងដែលសមរម្យ ដែលលោក Putin ត្រូវនិយាយបែបនោះទេ។ អ្នកគួរតែបញ្ចប់សង្រ្គាម ពោលគឺជាសង្រ្គាមដែលគួរតែកើតមានត្រឹម ១សប្តាហ៍ ឥឡូវនេះ ចូលឆ្នាំទី៤ ហើយ។ នេះគឺជាអ្វីដែលអ្នកគួរធ្វើ ជំនួសឲ្យការសាកល្បងមីស៊ីល»។

លោក Trump បាននិយាយម្តងហើយម្តងទៀតថា លោកចង់បញ្ចប់សង្រ្គាម នៅអ៊ុយក្រែន ជាប្រទេសដែលមានមនុស្សស្លាប់ច្រើនបំផុត នៅអឺរ៉ុប គិតចាប់តាំងពីសង្គ្រាមលោកលើកទី២ ទោះបីជាលោកបានប្រាប់ថា ដំណើរការស្វែងរកសន្តិភាព គឺពិបាកជាងការឈានដល់បទឈប់បាញ់ នៅតំបន់ហ្កាហ្សា ឬបញ្ចប់ជម្លោះ រវាងឥណ្ឌា និងប៉ាគីស្ថាន៕