ផ្សែងអ័ព្ទពុលបន្តគ្របដណ្តប់ទីក្រុង Lahore ប្រទេសប៉ាគីស្ថានកាលពីថ្ងៃអាទិត្យ ជំរុញឲ្យគុណភាពខ្យល់នៅទីក្រុងមួយនេះ ឡើងដល់កម្រិតជិតគ្រាអាសន្ន បើទោះបីជាក្រុមអាជ្ញាធរបរិស្ថានប្រកាសបង្កើនកិច្ចខិតខំរបស់ពួកគេក្នុងការពិន័យអ្នកបង្កកង្វក់បរិយាកាសក៏ដោយ ។

សន្ទស្សន៍គុណភាពខ្យល់សម្រាប់ទីក្រុងនៅភាគខាងកើតប៉ាគីស្ថានមួយនេះ បានឡើងដល់កម្រិត ៣៨៨ កាលពីវេលាម៉ោង ៩ព្រឹក ម៉ោងក្នុងស្រុក ធ្វើឲ្យកង្វក់បរិយាកាសនេះស្ថិតក្នុងកម្រិតគ្រោះថ្នាក់ និងបង្កជាក្តីបារម្ភដល់សុខភាពមនុស្សរាប់លាននាក់ ។

ក្រុមអាជ្ញាធរបានដាក់ការស្តីបន្ទោសការកើនឡើងកម្រិតកង្វក់បរិយាកាសនេះលើកង្វក់ក្នុងស្រុក និងកង្វក់រសាត់ឆ្លងកាត់ព្រំដែន ។

លោក Sajid Bashir គឺជាប្រធានគម្រោងនៅទីភ្នាក់ងារការពារបរិស្ថានខេត្ត Punjabនិយាយថា អំឡុងរដូវផ្សែងអ័ព្ទ ច្រករបៀងខាងកើតនឹងត្រូវបើក ធ្វើឲ្យខ្យល់បក់ពីឥណ្ឌាពីទិសឦសាន នាំកង្វក់បរិយាកាសចូលក្នុងទីក្រុង Lahore ។ 

លោកបន្តថា ច្បាស់ណាស់ថា ការប្រារព្ធពិធីបុណ្យ Diwali កាលពីពេលថ្មីៗនៅប្រទេសឥណ្ឌា មាននូវផលប៉ះពាល់លើពលរដ្ឋក្នុងស្រុករបស់ពួកយើង ៕