នៅថ្ងៃចន្ទ (ទី២៧ ខែតុលា) នេះ មន្ត្រីបានឲ្យដឹងថា យ៉ាងហោចណាស់មនុស្ស ៥០.០០០នាក់ ត្រូវបានជម្លៀសទៅកាន់ជំរុំសង្គ្រោះ នៅតំបន់ភាគខាងកើតនៃប្រទេសឥណ្ឌា ជាទីដែលត្រូវបានរំពឹងថា នឹងរងការវាយប្រហារដោយព្យុះស៊ីក្លូនដែលកំពុងវិវត្តខ្លាំងទៅៗ នៅឈូងសមុទ្រ Bengal ។

នាយកដ្ឋានឧតុនិយមឥណ្ឌា បានព្រមានថា ព្យុះស៊ីក្លូនឈ្មោះ Montha នឹងបោកបក់ទៅលើបណ្ដារដ្ឋឆ្នេរភាគខាងកើតនៃប្រទេសឥណ្ឌា ជាមួយនឹងខ្យល់ខ្លាំង និងភ្លៀងធ្លាក់ច្រើន មុនពេលវាប្រែក្លាយទៅជាព្យុះដ៏ធំ នៅថ្ងៃអង្គារ (ទី២៨ ខែតុលា)។

ឆ្នេរភាគខាងកើតឥណ្ឌា ងាយនឹងរងគ្រោះដោយសារព្យុះស៊ីក្លូន ក្នុងអំឡុងខែមេសា និងធ្នូ ដោយមានព្យុះតូចៗ និងធំៗជាច្រើនបោកបក់លើតំបន់នេះ។ ឥណ្ឌាធ្លាប់បានជួបប្រទះនឹងគ្រោះធម្មជាតិដ៏អាក្រក់បំផុត នៅក្នុងខែតុលា ឆ្នាំ១៩៩៩ នៅពេលដែលព្យុះស៊ីក្លូនដ៏ធំបំផុត បានផ្ដាច់ជីវិតមនុស្សប្រហែល ១០,០០០នាក់ នៅរដ្ឋ Odisha។

ហើយលើកនេះ រដ្ឋ Odisha និង Andhra Pradesh ត្រូវបានគេរំពឹងថា នឹងស្ថិតនៅដោយផ្ទាល់លើផ្លូវរបស់ព្យុះស៊ីក្លូននេះ។ ព្យុះស៊ីក្លូនចុងក្រោយគេបង្អស់នេះ ត្រូវបានគេរំពឹងថា នឹងបក់បោកឆ្លងកាត់ឆ្នេររបស់រដ្ឋ Andhra Pradesh នៅយប់ថ្ងៃនេះ។

ក្រុមមន្ត្រីបានលុបចោលថ្ងៃឈប់សម្រាក សម្រាប់បុគ្គលិកសង្គ្រោះបន្ទាន់ ហើយថែមទាំង បានបញ្ជាឲ្យបិទសាលារៀន និងមហាវិទ្យាល័យ នៅក្នុងតំបន់ឆ្នេរនៃរដ្ឋ Andhra Pradesh។ រដ្ឋាភិបាលរបស់រដ្ឋនេះ បានដាក់ពង្រាយក្រុមជួយសង្គ្រោះគ្រោះមហន្តរាយ ដើម្បីនាំក្រុមគ្រួសារ និងសមាជិកគ្រួសារចេញពីតំបន់ទំនាបៗ ក្នុងរដ្ឋ Andhra Pradesh នេះ។ ហើយគេរំពឹងថា យ៉ាងហោចណាស់មនុស្ស ៣,៩លាននាក់ នឹងរងផលប៉ះពាល់ដោយព្យុះស៊ីក្លូន នៅក្នុងរដ្ឋនេះ៕