នាយករដ្ឋមន្ត្រីកាណាដា លោក Mark Carney បាននិយាយនៅថ្ងៃចន្ទ (ទី២៧ ខែតុលា) នេះថា លោកបានត្រៀមខ្លួនជាស្រេច ដើម្បីពិភាក្សាជាមួយប្រធានាធិបតីអាមេរិក លោក Donald Trump បន្ទាប់ពីទីក្រុងវ៉ាស៊ីនតោន បានដំឡើងបន្ថែមពន្ធលើទំនិញកាណាដា ១០ភាគរយទៀត។

បន្ទាប់ពីលោក Trump បានបញ្ជាក់ថា លោកបានបញ្ចប់កិច្ចពិភាក្សាពាណិជ្ជកម្មទាំងអស់ជាមួយប្រទេសកាណាដា ដោយសារអ្វីដែលលោកហៅថា យុទ្ធនាការផ្សព្វផ្សាយក្លែងក្លាយ លោក Carney បានប្រាប់អ្នកសារព័ត៌មានថា៖ «យើងត្រៀមខ្លួនរួចជាស្រេច ដើម្បីអង្គុយចុះពិភាក្សាជាមួយសហរដ្ឋអាមេរិក ខ្លួនខ្ញុំផ្ទាល់ជាមួយលោកប្រធានាធិបតី សហសេវិករបស់ខ្ញុំជាមួយសហសេវិករបស់ពួកគេ នៅពេលដែលសហរដ្ឋអាមេរិកត្រៀមខ្លួនរួចជាស្រេច ដើម្បីអង្គុយចុះជជែកគ្នា»។

គួរបញ្ជាក់ថា លោក Carney បាននិយាយបែបនេះនៅក្រៅកិច្ចប្រជុំកំពូលក្នុងតំបន់ នៅប្រទេសម៉ាឡេស៊ី ដែលលោក Trump បានចូលរួមដែរ មុនពេលចាកចេញ នៅព្រឹកថ្ងៃទី៧ ខែតុលា ទៅកាន់ប្រទេសជប៉ុន។ លោក Carney បាននិយាយថា លោកមិនមានទំនាក់ទំនងជាមួយប្រធានាធិបតីអាមេរិក នៅទីក្រុងគូឡាឡាំពួរទេ។

តែជាមួយគ្នានេះ លោកបានបន្ថែមថា លោកបានយល់ព្រមជួបជាមួយប្រធានាធិបតីចិន លោក Xi Jinping ដោយមេដឹកនាំទាំង ២នាក់ គ្រោងចូលរួមកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅប្រទេសកូរ៉េខាងត្បូង នាថ្ងៃទី២៩ ខែតុលា។

លោក Carney បាននិយាយថា ការពិភាក្សាជាមួយលោក Xi នឹងរួមបញ្ចូល «ទំនាក់ទំនងពាណិជ្ជកម្មរបស់ប្រទេសទាំង២ ក៏ដូចជាការវិវត្តប្រែប្រួលនៃប្រព័ន្ធសកលផងដែរ»។ លោក Trump ក៏ត្រូវបានគេរំពឹងថានឹងចូលរួមពិធីអាហារពេលល្ងាច APEC ដូចគ្នាដែរ បើទោះបីជាប្រធានាធិបតីអាមេរិ កបាននិយាយថា លោកមិនមានគម្រោងជួបលោក Carney ក៏ដោយ៕