អ្នកស្រី Xie Dandan និងគ្រួសាររបស់គាត់ បានចិញ្ចឹមក្តាមរោម ដែលស្ថិតក្នុងចំណោមក្តាមដែលគេយកមកធ្វើម្ហូបដ៏ល្បីឈ្មោះបំផុតរបស់ចិន នៅក្នុងបឹង Yangcheng ស្ថិតក្នុងខេត្តភាគខាងកើត Jiangsu អស់រយៈពេលជាង ១ទសវត្សរ៍មកហើយ ប៉ុន្តែរយៈពេល ៣ឆ្នាំកន្លងមកនេះ ពួកគេជួបការលំបាកបំផុត ។

ចាប់តាំងពីឆ្នាំ ២០២២រហូតមក អ្នកស្រី Dandan វ័យ ៣៤ឆ្នាំ និងមិត្តកសិករបស់គាត់ បានប្រឈមនឹងសីតុណ្ហភាពខ្ពស់ខុសពីធម្មតា ហើយនិងរដូវក្តៅរយៈពេលយូរជាងមុនពុំអាចនឹកស្មានដល់ ដែលបានបង្អាក់ដល់វដ្តបង្កាត់ពូជក្តាមរបស់ពួកគេ ធ្វើឲ្យប៉ះពាល់ទិន្នផល និងបង្ខំឲ្យពួកគេរកវិធីសាស្រ្តថ្មី ក្នុងការរក្សាក្តាមរបស់ពួកគេឲ្យនៅមានជីវិត ។

អ្នកស្រី Dandan និយាយ ខណៈចងជើងក្តាមលក់ដល់អតិថិជនរបស់គាត់ថា បញ្ហាពុំបានធូរស្បើយនោះទេនៅរដូវស្លឹកឈើជ្រុះ ដោយសារវដ្តកំណើនសត្វក្តាមមានរយៈពេលយូរ ។ ពួកវាលូតលាស់យឺតជាងមុន ។

ក្រុមប្រជាកសិករចិញ្ចឹមក្តាមរោមបានរងផលប៉ះពាល់ផងដែរកាលពីឆ្នាំមុន ពេលព្យុះទីហ្វុង Bebinca ដែលជាព្យុះដ៏ខ្លាំងក្លាបំផុតវាយប្រហារតំបន់ឆ្នេរភាគខាងកើតប្រទេសចិន ចាប់តាំងពីឆ្នាំ ១៩៤៩ បានបំផ្លិចបំផ្លាញសំណាញ់ និងធ្វើឲ្យខូចប្រព័ន្ធអុកស៊ីសែនរបស់ពួកគេ បណ្តាលឲ្យបាត់បង់ក្តាមយ៉ាងច្រើន ។

ក្តាមរោមដែលគេស្គាល់ផងដែរថាជាក្តាមស្រោមដៃចិន ត្រូវបានគេដាក់ឈ្មោះក្រោយក្រញ៉ាំជើងរោមរបស់វា ។

ក្តាមទាំងនេះគេចង់បានខ្លាំង ដោយសារពងពណ៌មាសរសជាតិក្រែម និងប៊ឺរបស់វា ក៏ដូចជាសាច់ផ្អែម ហើយក្តាម ២គូ អាចលក់បានរាប់រយដុល្លារ ពេលដែលវានាំចេញទៅកាន់ប្រទេសក្រៅដូចជាសិង្ហបុរី និងជប៉ុន ។

ការចិញ្ចឹមក្តាមរោមត្រូវការកម្លាំងពលកម្មច្រើន ហើយបឹង Yangcheng ដែលជាបឹងទឹកសាបនៅទីក្រុង Suzhou ល្បីល្បាញថាជាកន្លែងចិញ្ចឹមក្តាមរោមដ៏មានឱរសជាតិបំផុត ។

កសិករចាប់ផ្តើមចិញ្ចឹមកូនញាស់ក្តាមរោមនៅក្នុងត្រពាំងរយៈពេលប្រហែល ១ឆ្នាំ មុនពេលពួកគេយកវាទៅកាន់បែនៅក្នុងបឹង ៕