ប្រធានាធិបតីអាមេរិកលោក Donald Trump ពុំបានច្រានចោលលទ្ធភាពនៃការស្វែងរកអាណត្តិទី៣ សម្រាប់សេតវិមាននោះទេ ដោយនិយាយថារូបលោកនឹងចង់ធ្វើ។ ប៉ុន្តែលោក Trump បានច្រានចោលលទ្ធភាពនៃការឈរឈ្មោះជាអនុប្រធានាធិបតីនៅឆ្នាំ ២០២៨ ជាគំនិតមួយបង្ហើបឡើងដោយក្រុមអ្នកគាំទ្រមួយចំនួនដែលជាមធ្យោបាយសម្រាប់លោកក្នុងការគេចចេញពីរដ្ឋធម្មនុញ្ញរបស់សហរដ្ឋអាមេរិកដែលរារាំងប្រធានាធិបតី មិនឱ្យឈរឈ្មោះសម្រាប់អាណត្តិទីបី។ 

ថ្លែងទៅកាន់អ្នកសារព័ត៌មានក្នុងអំឡុងពេលដំណើរទៅអាស៊ី លោក Trump បានហៅគំនិតនេះថា "គួរឱ្យស្រលាញ់ខ្លាំងណាស់" ហើយបាននិយាយថា "វាមិនត្រឹមត្រូវទេ" ។

គេមិនច្បាស់ទេថា តើរូបលោកនឹងប្រើវិធីណា ដើម្បីឈរឈ្មោះម្តងទៀត។ កាលពីសប្តាហ៍មុន អតីតអ្នកយុទ្ធសាស្ត្ររបស់លោក Trump គឺលោក Steve Bannon បាននិយាយថា ផែនការមួយបានកើតឡើងដើម្បីធានាបានថា ប្រធានាធិបតីវ័យ ៧៩ ឆ្នាំរូបនេះ អាចទទួលបានអាណត្តិមួយទៀត។

ថ្លែងទៅកាន់អ្នកសារព័ត៌មាននៅលើយន្តហោះ Air Force One ធ្វើដំណើរទៅកាន់ប្រទេសជប៉ុនពីប្រទេសម៉ាឡេស៊ី លោក Trump បាននិយាយថា ខណៈរូបលោកនឹង "ត្រូវបានអនុញ្ញាត" ឱ្យឈរឈ្មោះជាអនុប្រធានម្តងទៀត លោកថា លោកគ្មានគម្រោងធ្វើដូច្នេះទេ។

លោក Trump បាននិយាយថា បើនិយាយអំពីលទ្ធភាពនៃអាណត្តិទី ៣ រូបលោកពិតជាមិនបានគិតទេ។ ប៉ុន្តែលោកមានចំនួនភាគរយនៃម្ចាស់សន្លឹកឆ្នោតច្រើនបំផុតដែលលោកមិនធ្លាប់មាន។

លើសពីនេះទៀត លោកTrump ក៏បានស្នើឱ្យអនុប្រធានាធិបតីបច្ចុប្បន្នរបស់លោកគឺលោក JD Vance និងប្រមុខការទូតលោក Marco Rubio ជាអ្នកស្នងតំណែងដ៏មានសក្តានុពល ផងដែរ ដោយហៅពួកគេថា គ្មានអ្នកណាអាចបញ្ឈប់បាន៕