ប្រធានាធិបតីកាមេរូន លោក Paul Biya ដែលជាមេដឹកនាំកាន់តំណែងចាស់ជាងគេបំផុតរបស់ពិភពលោក បានចូលកាន់តំណែងអាណត្តិទីប្រាំបីកាលពីថ្ងៃចន្ទសប្ដាហ៍នេះ ក្រោយលទ្ធផលបោះឆ្នោតបានបង្ហាញពីជ័យជម្នះរបស់លោកជាថ្មីទៀត ដោយបង្កឱ្យមានការប៉ះទង្គិចគ្នារវាងកងកម្លាំងសន្តិសុខ និងក្រុមអ្នកគាំទ្រគណបក្សប្រឆាំង ដែលនិយាយថា ការបោះឆ្នោតមិនប្រក្រតី។ 

ក្រុមអ្នកគាំទ្របេក្ខភាពបក្សប្រឆាំងលោក Issa Tchiroma Bakary ប្រដាប់ដោយដំបង និងដុំថ្ម បានបិទផ្លូវរាយប៉ាយដោយកម្ទេចកម្ទី និងការដុតសំបកកង់រថយន្តនៅក្នុងរដ្ឋធានីពាណិជ្ជកម្ម ឌូអាឡា (Douala) របស់ប្រទេសអាហ្វ្រិកកណ្តាលមួយនេះ។

មេដឹកនាំបក្សប្រឆាំងរូបនេះបានអះអាងពីជ័យជម្នះ និងបានជំរុញឱ្យពលរដ្ឋតវ៉ាចំពោះលទ្ធផលនោះ ខណៈមានមនុស្ស៤នាក់បានស្លាប់។

កងកម្លាំងនគរបាលបានបាញ់ឧស្ម័នបង្ហូរទឹកភ្នែកទៅលើហ្វូងមនុស្សដែលពាក់ម៉ាស់ ឬព្យាយាមបិទមុខដោយក្រណាត់។ នៅផ្នែកផ្សេងទៀតនៃទីក្រុង ផ្លូវនានាដែលជាធម្មតាមានការធ្វើដំណើរអ៊ូអរ ប្រែក្លាយជាសភាពស្ងាត់ជ្រងំ។ 

លោក Biya វ័យ៩២ឆ្នាំជាមួយនឹងអាណត្តិថ្មី ដែលអាចរក្សារូបលោកឱ្យកាន់អំណាចរហូតដល់លោកមានវ័យជិត ១០០ ឆ្នាំ បាននិយាយថាប្រជាជនបានដាក់ការជឿជាក់លើការដឹកនាំរបស់លោកម្តងទៀតហើយបានសម្តែងការសោកស្ដាយចំពោះអំពើហិង្សានៅក្នុងសេចក្តីថ្លែងការណ៍ដែលបានបង្ហោះនៅលើប្រព័ន្ធផ្សព្វផ្សាយសង្គម X ៕