ប្រទេសអាហ្វហ្គានីស្ថាន និងប៉ាគីស្ថាន បានបើកការចរចានៅថ្ងៃទីបីក្នុងទីក្រុងអ៊ីស្តង់ប៊ុល ប្រទេសទួរគីកាលពីថ្ងៃចន្ទ ទី២៧ ខែតុលា ដើម្បីស្វែងរកបទឈប់បាញ់យូរអង្វែង ក្រោយការប៉ះទង្គិចគ្នាដ៏បង្ហូរឈាមក្នុងរយៈពេលជាច្រើនឆ្នាំមកនេះ។ ការប្រយុទ្ធគ្នារវាងប្រទេសជិតខាងអាស៊ីខាងត្បូងទាំង២ បានផ្ទុះឡើងបន្ទាប់ពីការផ្ទុះនៅទីក្រុងកាប៊ុល កាលពីថ្ងៃទី៩ ខែតុលា។

រដ្ឋាភិបាលក្រុមតាលីបង់ បានដាក់កំហុសការបំផ្ទុះទាំងនេះលើប្រទេសប៉ាគីស្ថាន ហើយបានបើកការវាយលុកនៅព្រំដែនជាការសងសឹក។ ការប៉ះទង្គិចគ្នាយ៉ាងខ្លាំងក្លាជាច្រើនថ្ងៃបានសម្លាប់មនុស្សរាប់សិបនាក់នៅភាគីទាំងសងខាងក្នុងជម្លោះដ៏បង្ហូរឈាមរបស់ខ្លួនចាប់តាំងពីក្រុមតាលីបង់បានវិលត្រឡប់ទៅកាន់អំណាចវិញក្នុងឆ្នាំ២០២១ ។

បន្ទាប់ពីបទឈប់បាញ់រយៈពេល៤៨ម៉ោងដំបូងរវាងប្រទេសជិតខាងដែលមានជម្លោះទាំងពីរអស់សុពលភាព បទឈប់បាញ់លើកទីពីរបានលេចចេញកាលពីថ្ងៃទី១៩ ខែតុលា បន្ទាប់ពីកិច្ចចរចានៅក្នុងទីក្រុងដូហា ដែលសម្របសម្រួលដោយប្រទេសកាតានិងប្រទេសទួរគី ទោះបីជាលក្ខខណ្ឌនានានៅតែមិនច្បាស់លាស់ក៏ដោយ។

ប្រភពព័ត៌មាន បានចោទក្រុមអ្នកចរចាតាលីបង់ថាបង្ហាញពីភាពរឹងរូស និងខ្វះភាពហ្មត់ចត់។ រដ្ឋមន្ត្រីការពារជាតិប៉ាគីស្ថាន លោក Khawaja Asif បានព្រមានកាលពីថ្ងៃសៅរ៍ថា ការបរាជ័យក្នុងការឈានដល់កិច្ចព្រមព្រៀងអាចនាំឱ្យមាន «សង្គ្រាមដោយបើកចំហ»។