​រុស្ស៊ី៖ ប្រទេស​រុស្ស៊ី​បាន​បន្ត​ធ្វើ​សម​យុទ្ធ​កងទ័ពជើងទឹក និង​ទ័ពអាកាស​កាលពី​ថ្ងៃ​អង្គារ ក្នុង​ពេល​មាន​ការ​ព្រួយបារម្ភ​អំពី​ការឈ្លានពាន​របស់​រុស្ស៊ី​ ដែល​អាច​កើតមាន​លើ​ប្រទេសអ៊ុយ​ក្រែ​ន និង​ការពិភាក្សា​ផ្នែក​ការទូត​កម្រិត​ខ្ពស់ ក្នុង​គោលបំណង​ធ្វើឱ្យ​ស្ថានការណ៍​កាន់តែ​ធូរស្រាល​ពី​ភាព​តានតឹង​។

សមយុទ្ធ​នៅលើ​អាកាស​រួមមាន​ទាំង​យន្តហោះ​ចម្បាំង SU-25SM3 នៅ​តំបន់ Krasnodar ភាគខាងត្បូង​ក្បែរ​ប្រទេស​អ៊ុយ​ក្រែ​ន ហើយ​សមយុទ្ធប្រឆាំង​ចោរ​សមុទ្រ​ត្រូវបាន​ធ្វើឡើង​ដោយកងទ័ព​ជើង​នៅ​សមុទ្រ​អា​ត្ល​ង់​ទិ​ក ដែល​រួមមាន​នាវាចម្បាំង​បំពាក់​មី​ស៊ី​ល "Marshal Ustinov" នាវាចម្បាំង " Admiral Kasatonov" និង​នាវា​ប្រឆាំង​នាវាមុជទឹក​ "Vice-Admiral Kulakov"។ វីដេអូ​បាន​បង្ហាញ​ឲ្យ​ឃើញអង្គភាព​ដែនសមុទ្រ​សម្រុក​ឡើងលើ​នាវាដើម្បី​ស្វែងរក ​និង​កម្ចាត់​ចោរ​សមុទ្រ​។ ក្រសួងការពារជាតិ​រុស្ស៊ី​បាន​និយាយ​កាលពី​ថ្ងៃ​អង្គា​រថា ក្រសួង​កំពុង​ផ្លាស់ប្តូរ​នាវា​ចូល​ចត​ចំនួន ៦​គ្រឿង​ពី​សមុទ្រ​មេ​ឌី​ទែ​រ៉ា​ណេទៅកាន់​សមុទ្រ​ខ្មៅ​ដើម្បី​ធ្វើ​សមយុទ្ធ​។​ ​យោង​តាម​ក្រសួង​បាន​ឱ្យ​ដឹង​ថា នាវា​ចូល​ចត​ធំ​ចំនួន​ ៣​គ្រឿង​កំពុង​ឆ្លងកាត់​ច្រក​សមុទ្រ Dardanelles​។ ច្រក​សមុទ្រ​នេះ​ភ្ជាប់​សមុទ្រ Aegean ទៅ​សមុទ្រ Marmara ដែល​ត​ភ្ជាប់​ទៅ​សមុទ្រ​ខ្មៅ​តាមរយៈ​ច្រក​សមុទ្រ Bosporus។

​សមយុទ្ធ​នៅលើ​សមុទ្រ​ខ្មៅ​គឺជា​ផ្នែក​មួយ​នៃ​សមយុទ្ធ​កងទ័ពជើងទឹក​ទ្រង់ទ្រាយ​ធំ​នៅក្នុង​តំបន់​។​ ​ក្រសួងការពារជាតិ​រុស្ស៊ីបាន​និយាយ​កាលពី​ថ្ងៃ​អង្គា​រថា នាវា​ធំៗ​ចំនួន​ ៦គ្រឿង​នេះកំពុង​ធ្វើដំណើរ​ពី​សមុទ្រ​មេ​ឌី​ទែ​រ៉ា​ណេ​ទៅកាន់​សមុទ្រ​ខ្មៅ ជា​កន្លែង​ដែល​ពួកគេ​នឹងចូលរួម ក្នុង​សមយុទ្ធ​យោធា​។ កិច្ចខិតខំ​ប្រឹងប្រែង​ផ្នែក​ការទូត ​ដើម្បី​កាត់បន្ថយ​ភាព​តានតឹងជុំវិញបញ្ហាប្រទេស​អ៊ុយ​ក្រែ​ន​ បាន​បន្ត​ជាមួយ​ប្រធានាធិបតី​បារាំង Emmanuel Macron មកដល់​ទីក្រុងគៀវ មួយថ្ងៃ​បន្ទាប់ពី​កិច្ច​ចរចា​ជាច្រើន​ម៉ោង​ជាមួយ​មេដឹកនាំរុស្ស៊ីនៅ​ទីក្រុង​ម៉ូស្គូ មិន​ទទួលបាន​លទ្ធផលក្នុងការ​ទម្លាយ​ភាពជាប់គាំង៕

អត្ថបទ៖ ប៊ុនថន