ប្រធានាធិបតីរុស្ស៊ី លោក Vladimir Putin បានជួបជាមួយរដ្ឋមន្ត្រីការបរទេសកូរ៉េខាងជើង លោកស្រី Choe Son Hui ក្នុងជំនួបកម្រិតខ្ពស់ចុងក្រោយបង្អស់រវាងប្រទេសទាំងពីរ ដែលបានពង្រឹងទំនាក់ទំនងកាន់តែខ្លាំងឡើងក្នុងអំឡុងសង្គ្រាមអ៊ុយក្រែន។

វីដេអូដែលចេញផ្សាយដោយទីភ្នាក់ងារព័ត៌មានរដ្ឋរុស្ស៊ី Sputnik បានបង្ហាញឱ្យឃើញ លោក Putin ស្វាគមន៍យ៉ាងកក់ក្ដៅដល់លោកស្រី Choe នៅវិមានក្រឹមឡាំង កាលពីថ្ងៃចន្ទ (២៧ តុលា) ហើយប្រមុខការទូតរបស់រុស្ស៊ី លោក Sergey Lavrov ក៏បានបង្ហាញវត្តមានក្នុងកិច្ចប្រជុំនោះផងដែរ។

លោក Putin បាននិយាយថា "ទំនាក់ទំនង និងអនាគតនៃការអភិវឌ្ឍ" របស់ប្រទេសទាំងពីរ កំពុងរីកចម្រើនទៅតាមផែនការ និងបានសម្ដែងការសួរសុខទុក្ខរបស់លោកដល់មេដឹកនាំកូរ៉េខាងជើង លោក Kim Jong Un នេះបើយោងតាមសារព័ត៌មាន Sputnik ។ លោកស្រី Choe វិញក៏បានពាំនាំ "ពាក្យជូនពរដ៏កក់ក្តៅ" ពីលោក Kim ដោយលើកសរសើរ "ភាពជិតស្និទ្ធ" នៃទំនាក់ទំនងរុស្ស៊ី-កូរ៉េខាងជើង នៅក្នុងកិច្ចពិភាក្សាជាមួយលោក Lavrov ។

ទីក្រុងមូស្គូ និងទីក្រុងព្យុងយ៉ាង ដែលកំពុងស្ថិតក្រោមទណ្ឌកម្មយ៉ាងទូលំទូលាយរបស់លោកខាងលិច បានពង្រឹងទំនាក់ទំនងយ៉ាងខ្លាំងក្នុងប៉ុន្មានឆ្នាំថ្មីៗនេះ រួមទាំងការចុះហត្ថលេខាលើកិច្ចព្រមព្រៀងការពារជាតិឆ្នាំ២០២៤ ដែលប្តេជ្ញាថា ប្រទេសទាំងពីរផ្តល់ការគាំទ្រផ្នែកយោធាដល់ភាគីម្ខាងទៀតនៅក្នុងករណីដែលមាន “ការឈ្លានពាន” ពីខាងក្រៅ៕