ការបិទរដ្ឋាភិបាលសហរដ្ឋអាមេរិក បានឈានចូលដល់ថ្ងៃទី២៧ របស់ខ្លួនហើយ ចាប់តាំងពីថ្ងៃបិទដំបូងទី១ ខែតុលា មក (គិតតាមពេលវេលានៅទីក្រុងវ៉ាស៊ីនតោន) ដែលធ្វើឱ្យភាពជាប់គាំងនេះក្លាយជារយៈពេលយូរបំផុតទីពីរក្នុងប្រវត្តិសាស្ត្រអាមេរិក ខណៈសញ្ញានៃកិច្ចព្រមព្រៀងផ្ដល់មូលនិធិថ្មីដើម្បីបើករដ្ឋាភិបាលឡើងវិញ នៅតែមើលមិនទាន់ឃើញឡើយ ដោយសារគណបក្សប្រជាធិបតេយ្យ និងគណបក្សសាធារណរដ្ឋ បន្តខ្វែងគំនិតគ្នាយ៉ាងជូរចត់ក្នុងសភា។

ប្រព័ន្ធផ្សព្វផ្សាយបានរាយការណ៍ថា ផលប៉ះពាល់ដ៏ទូលំទូលាយនៃការបិទរដ្ឋាភិបាលនេះ បានរាលដាលពាសពេញសហរដ្ឋអាមេរិក។ រដ្ឋមន្ត្រីដឹកជញ្ជូនអាមេរិក លោក Sean Duffy បានព្រមានរួចមកហើយថា នៅពេលរដ្ឋាភិបាលបន្តបិទ បុគ្គលិកត្រួតពិនិត្យចរាចរណ៍ផ្លូវអាកាសក៏បន្តមិនទទួលបានប្រាក់ឈ្នួលដែរ មានន័យថា អាចនាំឱ្យមានចលាចលជើងហោះហើរកាន់តែអាក្រក់។

សហព័ន្ធបុគ្គលិករដ្ឋាភិបាលអាមេរិក ដែលជាសហជីពតំណាងឱ្យតួលេខធំបំផុតនៃបុគ្គលិករដ្ឋាភិបាល បានអំពាវនាវឱ្យសភាអនុម័តច្បាប់ផ្តល់មូលនិធិរយៈពេលខ្លីដើម្បីបើករដ្ឋាភិបាលឡើងវិញជាបណ្ដោះអាសន្ន ខណៈបុគ្គលិកសហព័ន្ធរាប់រយពាន់នាក់កំពុងជួបបញ្ហាហិរញ្ញវត្ថុដោយសាររឿងនេះ។

ភាពជាប់គាំងនេះកើតចេញពីការខ្វែងគំនិតយ៉ាងស៊ីជម្រៅរវាងអ្នកសាធារណរដ្ឋ និងអ្នកប្រជាធិបតេយ្យ លើបញ្ហាសំខាន់ៗ ដូចជាការចំណាយលើសុខុមាលភាពទាក់ទងនឹងការថែទាំសុខភាពជាដើម។ ព្រឹទ្ធសភាបរាជ័យជាច្រើនលើកមកហើយក្នុងការអនុម័តសំណើផ្តល់មូលនិធិថ្មី មុនឆ្នាំសារពើពន្ធបញ្ចប់នៅថ្ងៃទី៣០ ខែកញ្ញា ដែលបណ្តាលឱ្យរដ្ឋាភិបាលអស់ថវិកាប្រតិបត្តិការ ហើយក៏បានបិទចាប់តាំងពីថ្ងៃទី១ ខែតុលា ឆ្នាំ២០២៥ នេះមក៕