មន្ត្រីវិមានក្រឹមឡាំង បាននិយាយកាលពីថ្ងៃចន្ទ (២៧ តុលា) ថា ការសាកល្បងមីស៊ីលដើរដោយថាមពលនុយក្លេអ៊ែរថ្មីរបស់រុស្ស៊ី ដែលខ្លួនអះអាងថាមិនមានខែលដែនអាកាសណាអាចបញ្ឈប់បាននោះ ជាការឆ្លុះបញ្ចាំងពីការប្តេជ្ញាចិត្តរបស់ទីក្រុងមូស្គូ ក្នុងការការពារផលប្រយោជន៍សន្តិសុខរបស់ខ្លួន បន្ទាប់ពីការរិះគន់របស់ទីក្រុងវ៉ាស៊ីនតោន និងបណ្តាប្រទេសនៅអឺរ៉ុប បានបង្កើនសម្ពាធលើលោកប្រធានាធិបតីរុស្ស៊ី Vladimir Putin ឱ្យចរចាបញ្ចប់សង្រ្គាមនៅអ៊ុយក្រែន។

ប្រធានាធិបតីអាមេរិក លោក Donald Trump បានរិះគន់ខ្លាំងៗថា លោក Putin គួរតែផ្តោតលើការបង្កើតកិច្ចព្រមព្រៀងសន្តិភាពដើម្បីបញ្ចប់ជម្លោះ មិនមែនទៅសាកល្បងមីស៊ីលនោះទេ។

មានសេចក្ដីលម្អិតតិចតួចណាស់អំពីមុខងារមីស៊ីល Burevestnik ដ៏មានឥទ្ធិពលរបស់រុស្ស៊ីមួយនេះ ដែលសម្ព័ន្ធយោធាណាតូ ដាក់ឈ្មោះឱ្យថា "Skyfall"។ កាលពីថ្ងៃអាទិត្យ នាយសេនាធិការរបស់រុស្ស៊ី បានប្រាប់លោក Putin ថា មីស៊ីលនេះធ្វើដំណើរបានរយៈចម្ងាយ ១៤.០០០គីឡូម៉ែត្រ និងហោះលើអាកាសបានដល់ទៅ ១៥ម៉ោង នៅក្នុងការសាកល្បងមួយ។

នៅពេលត្រូវសាកសួរថា តើការប្រកាសក្ដែងៗលើមីស៊ីលថ្មីនេះគឺជាការឆ្លើយតបទៅនឹងទណ្ឌកម្មអាមេរិក និងជាសញ្ញាព្រមានទៅលោកខាងលិច ឬយ៉ាងណា — អ្នកនាំពាក្យវិមានក្រឹមឡាំង លោក Dmitry Peskov បាននិយាយថា "រុស្ស៊ីកំពុងធ្វើការយ៉ាងខ្ជាប់ខ្ជួនដើម្បីធានាសន្តិសុខផ្ទាល់ខ្លួន"។ លោកបន្តថា "ការធានាសន្តិសុខគឺជាបញ្ហាសំខាន់សម្រាប់រុស្ស៊ី ជាពិសេសប្រឆាំងនឹងមនោសញ្ចេតនាយោធានិយម ដែលគ្រប់គ្នាកំពុងដឹងឮនាពេលបច្ចុប្បន្ននេះ ជាចម្បងពីអឺរ៉ុប"៕